किवानिज क्लब अफ रुपन्देही लुम्बिनीद्वारा विद्यार्थीलाई एक वर्षमा १० लाख बढी राहत वितरण

बुटवल । बालबालिकाको क्षेत्रमा काम गर्दै आएको ‘किवानिज क्लब अफ रुपन्देही लुम्बिनी’को तेस्रो बैठक सहयोगका लागि विद्यालय छनोट लगायतका निर्णयसहित शुक्रबार सम्पन्न भएको छ । किवानिज क्लबले सदस्यहरुबाट नै आर्थिक संकलन गरी विभिन्न शैक्षिक संस्थाहरुमा विपन्न तथा गरिव परिवारका विद्यार्थीलाई सहयोग उपलब्ध गराउँदै आएको छ ।  

यसैबीच तिलोत्तमा नगरपालिका–७ मा अवस्थित प्रभात माविका २ सय जना विद्यार्थीलाई जुत्ता, खेलकुदका सामग्री तथा स्टेश्नरीका सामग्री वितरण गर्ने निर्णय भएको अध्यक्ष मनोज आचार्यले जानकारी दिए । तिलोत्तमामा सम्पन्न बोर्ड मिटिङमा ३ जना नयाँ सदस्यहरुलाई स्वागत, विभिन्न संघ–संस्थाको नेतृत्वमा चयन भएका सदस्यहरुलाई सम्मान तथा आगामी मार्च ७ देखि ९ सम्म हुने एसिया प्यासेफिक सम्मेलनका लागि क्लबको प्रतिनिधित्व गरेर जान लागेका पूर्व अध्यक्ष सुरज पङ्गेनीलाई बधाईसहित विदाई कार्यक्रम सम्पन्न भएको अध्यक्ष आचार्यले जानकारी दिए । 

रुपन्देहीमा सन् २०१७ देखि सक्रिय हुँदै आएको किवानिज क्लबमा ३२ जना सदस्य रहेका छन् । क्लबले पछिल्लो १ वर्षको अवधिमा मात्रै रुपन्देहीका विभिन्न शैक्षिक संस्थाहरुमा विद्यार्थीलाई १० लाख रुपैयाँ बराबरको सहयोग उपलब्ध गराएको सचिव किशोर पङ्गेनीले जानकारी गराए । 

शुक्रबार आयोजित कार्यक्रममा क्लबका सदस्य विष्णु भण्डारी तिलोत्तमा–७ प्रगती टोल बिकास संस्थाको अध्यक्ष निर्वाचत भएको भन्दै खादा र माला लगाएर सम्मान गरिएको थियो । यसैगरी रुपन्देही रोडा ढुङ्गा व्यवसायी संघको अध्यक्षमा निर्वाचित क्बलका सदस्य गोविन्द भुसाल, तिलोत्तमा–९ स्थित गौतमबुद्ध सामुदायिक विद्यालयको व्यवस्थापन समितिको अध्यक्ष बनेका नारायण पोखरेल तथा ड्रिम भ्यू रिसोर्ट सञ्चालनमा ल्याएका अशोक दर्लामीलाई क्लबले सम्मान गरेको थियो ।