सर्लाही । जिल्लाको लालबन्दीबाट मात्रै आर्थिक वर्ष ०७६र७७ मा तीन अर्ब रुपैयाँभन्दा बढीको तरकारी निर्यात भएको छ । लालबन्दी, ईश्वरपुर र हरिवन नगरपालिकालगायतका छिमेकी स्थानीय निकायबाट मात्रै तीन अर्ब १८ करोड २६ लाख ८० हजारको तरकारी निकासी भएको हो ।
सर्लाहीको लालबन्दी, ईश्वरपुर र हरिवन नगरपालिकालगायत क्षेत्रमा स्थानीयले करिब एक हजार बिघामा उत्पादन गरेको तरकारी लालबन्दीमा आउने गरेको र सोही तरकारी देशका विभिन्न स्थानमा निकासी हुने गरेको कृषि बजार व्यावस्थापन समिति लालबन्दीले जनाएको छ । जिल्लाबाट ११ करोड ९५ लाख ६७ हजार १३५ किलो तरकारी बाहिरिएको कार्यालयले जनाएको छ ।
कार्यालयका अनुसार गोलभेडाको पकेट क्षेत्रका रूपमा चिनिएको लालबन्दीबाट वार्षिक सबैभन्दा बढी ५० प्रतिशत गोलभेडा बाहिरिने गरेको कार्यालयले जनाएको छ । त्यस्तै पर्वल २५ प्रतिशत, बोडी १० प्रतिशत, सिमी १० प्रतिशत र भिन्डी, काउली, बन्दा, भान्टा, घिरौंला, झिँगनी, लौका, फर्सी, मुन्गा र मुलालगायत पाँच प्रतिशत तरकारी लालबन्दीबाट देशका विभिन्न स्थानमा जाने गरेको कार्यालयले जनाएको छ ।
तरकारी खेतीबाट मनग्ये आम्दानी हुन थालेपछि किसान व्यावसायिक रूपमा तरकारी खेतीप्रति आकर्षित हुँदै आएका छन् । परम्परागत अन्नबाली छोडेर व्यावसायिक तरकारी खेती गर्दै आइरहेका सर्लाहीका बासिन्दाले करिब एक हजार बिघामा तरकारी खेती गर्ने गरेको कृषि ज्ञान केन्द्र मलंगवाले जनाएको छ ।
प्रतिक्रिया