१८ औँ मनमोहन स्मृति फुटबलको उपाधिका लागि वडा नम्बर ११ र १२ भिड्ने

बुटवल । बुटवलमा जारी १८ औँ मनमोहन स्मृति वडास्तरीय नकआउट फुटबल प्रतियोगिता २०८२ को उपाधिका लागि वडा नं. ११ र वडा नं. १२ बीच फाईनल खेल हुने भएको छ । फाईनल खेल आईतबार हुनेछ ।

शुक्रबार भएको दोस्रो सेमीफाईनलमा वडा नं। ११ ले वडा नं। १० लाई सडेन डेथमा ६–५ गोल अन्तरले पराजित गर्दै उपाधि दाबेदारी पेश गरेको हो । यसैगरि बिहिबार भएको पहिलो सेमीफाईनल खेलमा वडा नं। १२ लाई ट्राईबेकरमा पराजित गर्दै वडा नं। १७ विजयी भएको थियो । टिममा बाहिर खेलाडी राखेको उजुरीको आधारमा वडा नं।१७ अयोग्य घोषित भई बाहिरिएसंगै वडा नं। १२ फाईनलमा पुगेको संघका अध्यक्ष गणेश बोहराले बताए । ‘दुई दिनसम्म छानबिन गरि यो निर्णय लिएको हौ ।’– उनले भने । 

शुक्रबार सिद्धेश्वर खेलमैदानमा भएको निक्कै प्रतिस्प्रर्धात्मक खेलको १२ र ४७ औ मिनेटमा वडा नं। १० का अनुप गुरुङले गोल गरेका थिए । वडा नं। ११ का दर्शन बिकले खेलको ४० औ र अनिल क्षेत्रीले ६२ औ मिनेटमा गोल गर्दै खेल बराबरीमा ल्याए । निर्धारित समयमा थप गोल हुन नसकेपछि खेल ट्राईबेकरमा धकेलियो । खेलमा वडा नंं ११ का अनिल क्षेत्री प्लेयर अफ दी म्याचबाट पुरस्कृत भए । 

प्रतियोगिताको उपाधि विजेताले नगद १ लाख ११ हजार १ सय ११ रुपैया तथा उपविजेताले नगद ५५ हजार ५ सय ५५ रुपैया, कप, मेडल तथा प्रमाणपत्रबाट पुरस्कृत गरिने संयोजक राजेन्द्र थापाले बताए । यसैगरि विधागत उत्कृष्ट खेल प्रदर्शन गर्ने खेलाडीहरुलाई समेत नगदसहित पुरस्कृत गरिने उनले बताए । प्रतियोगितामा नगरका १६ टिमले प्रतिस्प्रर्धा गर्ने भएका छन ।