ग्लोबल आवाजAdvertisement
बुटवल । पाठक मञ्च, बुटवलको आयोजनामा ‘सभासद् नजीर मियाँसँग पुस्तक संवाद’ सम्पन्न भएको छ । कार्यक्रममा मियाँ लिखित आत्म संस्मरणात्मक कृति ‘संघर्षशील जीवन’ विषयक अन्तरक्रिया भएको थियो ।
पहिलो संविधान सभाका सदस्य नजीर मियाँको कृति सम्भवतः नेपाली मुस्लिम समुदायबाट लेखिएको पहिलो संस्मरणात्मक कृति भएको वक्ताहरुले जिकिर गरे । कार्यक्रममा पुस्तक परिचर्चा गर्दै लेखक तथा पत्रकार डि.आर.घिमिरेले अर्घाखाँचीको एउटा सानो गाउँपालीमा जन्मिएर देशकै विशिष्ट व्यक्तित्वको रुपमा स्थापित हुन पुुगेका मियाँको कृतिबाट मुस्लिम र गैर मुस्लिम समुदाय बीचको सद्भाव र सहिष्णुता उजागर गरेको उल्लेख गरे । त्यस्तै अध्येता रामचन्द्र श्रेष्ठले अहिलेको संविधानमा उल्लेख गरिएका मुुस्लिम अधिकारहरु नजीरको नेतृत्वमा सम्भव भएको उल्लेख गरे । श्रेष्ठले विभिन्न पार्टीका नेताहरुलाई समेटेर मुस्लिम समुदायको अधिकारका लागि मियाँको संघर्ष पुस्तकमा दस्तावेजीकरण भएको चर्चा गरे ।
यसैगरी नसीब दार मियाँले पुस्तकले मुस्लिम समुदाय हो र धर्म इस्लाम हो भन्ने तथ्य पुस्तकले स्थापित गरेको बताए । कार्यक्रममा संविधान सभा सदस्य नेत्र पन्थीले नजीर मियाँको सांगठनिक जीवन र संविधान सभामा खेलेको भूमिकाबारे चर्चा गरे । त्यस्तै लेखक झपेन्द्र जिसीले थप पुस्तकको लेखनको शुभकामना दिए ।
कार्यक्रममा उठेका जिज्ञासाहरुको जवाफ दिदै लेखक मियाँले मुस्लिम समुदायमा अध्ययनको कमी भएको कारण पनि पुस्तक लेखेको बताए । जनसंख्याको हिसाबले नेपालमा मुुस्लिम सातौं ठूलो जाति भएको हुनाले अल्पसंख्यक भन्नु गलत हुने चर्चा गर्दै मियाँले भने, “नेपाल अल्पसंख्यक नै अल्पसंख्यकको देश हो । यी अल्पसंख्यक बीचको सहिष्णुता नै नेपालको गौरव हो ।” संविधान निर्माणको प्रसङ्गहरु चर्चा गर्दै मियाँले यो संविधानले पहिलोपटक मुस्लिम समुदायलाई सम्बोधन गरेको बताए । मियाँले भने, “यो संविधानले पहिलोपटक मुस्लिम समुदायलाई पहिचान दिएको छ । मुस्लिम समुदायको हक अधिकार स्थापित गरेको छ ।” पाठक मञ्च, बुटवलका माधव गौतमको सञ्चालनमा कार्यक्रम भएको थियो ।
प्रतिकृया दिनुहोस्