भैरहवा । रोटरी क्लब अफ भैरहवाले राष्ट्रिय बाल दिवसको अवसरमा सिद्धार्थनगर नगरपालिका–११, स्थित भुजौली आधारभूत विद्यालयमा अध्यनरत कक्षा १ देखि ५ सम्मका १०३ जना विद्यार्थीहरुको आँखा जाँच शिविर कार्यक्रम सम्पन्न गरेको छ । रोटरी क्लब अफ भैरहवाका वर्ष २०२३–२४ का अध्यक्ष उमेश चन्द्र आचार्यको अध्यक्षतामा भएको कार्यक्रममा लुम्बिनी नेत्रालय, भैरहवाले प्राबिधिक सहयोग गरेको थियो।

कार्यक्रम संयोजक राजु पाण्डेको स्वागत तथा सचिब हरी प्रसाद आचार्यको संचालनमा सम्पन्न भएको कार्यक्रममा प्रमुख अतिथि क्लबका एसिष्टेन्ट गभर्नर हिरा बहादुर शाहले क्लबले गर्न लागेको यस्तो मानवीय कार्यमा सधै आफ्नो साथ रहने बताए । साथै क्लबले यो विद्यालयमा अन्य स्वास्थ सम्बन्धि कार्यक्रम पनि संचालन गर्नु पर्ने कुरामा जोड दिए। कार्यक्रममा विद्यालयका प्राचार्य राधा आचार्यले रोटरी क्लब अफ भैरहवालाई बिशेष धन्यवाद दिदै आगामी दिनमा पनि अन्य सहयोगको अपेक्षा राखे।

साथै क्लबका प्रेसिडेन्ट इलेक्ट राम प्रसाद पन्थीले यो उमेर समुहका बाल बालिका आफुले नै आँखा सम्बन्धि समस्या व्यक्त गर्न नसक्ने भएकोले नै यस्ता शिविरको आवश्यकता रहेको बताए। कार्यक्रममा वर्ष २०२३–२४ का अध्यक्ष उमेशचन्द्र आचार्यले राष्ट्रिय बाल दिवसको अवसरमा स्वार्थ भन्दा माथि सेवा भन्ने भावनाका साथ् यस्तो मानवीय सेवामा जोडिन पाउँदा आफुलाई गर्व लागेको कुरा उल्लेख गर्दै विद्यालयलाई रोटरीको फोरवे टेस्ट हस्तान्तरण गरेका थिए ।