ढोलीमारामा होमस्टे व्यवस्थापन तालिम

पाल्पा । ढोलीमारा सामुदायिक होमस्टेको आयोजना र पूर्वखोला गाउँपालिका, पाल्पाको सहयोगमा सञ्चालित होमस्टे सञ्चालन र व्यवस्थापन सम्बन्धि आधारभूत तालिम, पूर्वखोला-२, जल्पाको ढोलीमारामा बुधवार सम्पन्न भएको छ । तालिमको उद्घाटन गर्दै पूर्वखोला गाउँपालिकाका अध्यक्ष नुनबहादुर थापाले गाउँपालिकाको शानको रुपमा रहेको ढोलीमारा सामुदायिक होमस्टेले छोटो समयमै ग्रामीण पर्यटन विकासको आधार तयार पारेको बताए ।

साथै उनले ढोलीमारामा होमस्टे सञ्चालन हुन थालेपछि गाउँको पहिचान बढेको, स्थानीयहरुमा स्वरोजगार सिर्जना सम्भव भएको र गाउँको उत्पादन गाउँमै खपत हुन थालेकोले आफू खुसी भएको बताउँदै होमस्टेको स्थायित्वका लागि आवश्यक पर्ने सबै पूर्वाधारका निम्ति कटिवद्ध रहने बताए । गाउँपालिकाकी उपाध्यक्ष भागिरथा भट्टराईले महिलाहरुको सार्थक सहभागितामा सञ्चालित ढोलीमारा सामुदायिक होमस्टेले महिला जागरण, आर्थिक उपार्जन र सांस्कृतिक गतिविधिहरुलाई टेवा दिएको बताइन् । वडा नम्बर २, जल्पाका अध्यक्ष निरबहादुर सारुले आफूहरुको लामो प्रयास र अभ्यासपछि ढोलीमारा गाउँमा होमस्टे सुरुआत् भएको र यसको दीर्घकालीन सञ्चालन र व्यवस्थापनका निम्ति तालिम उपलब्धिपूर्ण हुने बताए ।

तालिममा होमस्टे सञ्चालन र व्यवस्थापनका आधारहरु,लुम्बिनी प्रदेश सरकारले तयार पारेको होमस्टे कार्यविधि–२०७६, होमस्टेले तयार पारेको मेनू,होमस्टे सञ्चालक र पाहुनाहरुका लागि तयार गरिएको आचारसंहिता, होमस्टे व्यवस्थापन समिति, उपसमितिहरु र तिनका काम, कर्तव्यहरुका सन्दर्भमा पर्यटनकर्मी दलबहादुर गुरुङले सहजीकरण गरेका थिए ।

तालिमकै क्रममा सहभागी होमस्टे सञ्चालकहरुले मगर संस्कृति झल्किने सांस्कृतिक कार्यक्रम प्रदर्शन समेत गरेका थिए । त्यसै गरी कलाकार बेनप्रसाद थापाले आफूले तयार पारेको ढोलीमारा गाउँको कलात्मक चित्र, उपहार स्वरुप होमस्टे समितिका अध्यक्षलाई प्रदान गरेका थिए ।

तालिमपछि सहभागीका तर्फबाट सीमा बाह्रघरे, चुराबहादुर कवरमगर, मनबहादुर ठाडामगर, सामाजिक अभियन्ता माया राना र होमस्टेका अध्यक्ष पहलसिंह घर्तिमगरले तालिम फलदायी भएको, थप तालिमका लागि गाउँपालिकाले सक्दो सहयोग गर्नुपर्ने र ढोलीमारा सामुदायिक होमस्टेलाई जिल्लाकै नमूना होमस्टे बनाउन आफूहरु क्रियाशील र गतिशील हुने बताए ।