मास्क नलगाई घरबाहिर निस्कनेलाई पक्राउ गर्न गृहको निर्देशन

बुटवल । गृह मन्त्रालयले मास्क नलगाई घरबाहिर निस्कनेलाई पक्राउ गर्न निर्देशन दिएको छ । गृह-प्रवक्ता (सह-सचिव) केदारनाथ शर्माले देशभरका प्रमुख जिल्ला अधिकारी र प्रहरी प्रधान कार्यालयलाई यस्तो निर्देशन दिइएको जानकारी दिए । उनका अनुसार मास्क नलगाई घरबाहिर निस्कनेलाई संक्रमण रोग ऐन, २०२० अन्तर्गत कारबाही गरिने छ । 

लकडाउनमा कडाइ नहुँदा कोरोना महामारी नियन्त्रणमा समस्या हुन सक्ने भएकाले यस्तो निर्देशन जारी गरिएको उनले बताए । कोरोना भाइरसको संक्रमणलाई नियन्त्रणमा लिन सरकारले जरुरी कामबाहेक घरबाहिर ननिस्कने, निस्कँदा अनिवार्य मास्क लगाउने, एकअर्काबीच कम्तीमा २ मिटरको सामाजिक दूरी कायम गर्नुपर्ने बताएको थियो ।