ताजा अपडेट »

यसपालीको मनसुनमा लुम्बिनी प्रदेशका करिब ४६ हजार मानिस जोखिममा

सोमबार, २९ जेठ २०८०, ११ : ५८
10 Shares

बुटवल । लुम्बिनी प्रदेशमा यस वर्षको मनसुनबाट करिब ४६ हजार मानिस प्रभावित हुने विपद् न्यूनीकरण तथा व्यवस्थापन प्राधिकरणले प्रक्षपण गरेको छ । बाढी तथा पहिरोका कारण १९ हजार ९८६ घर परिवारका ४५ हजार ७३५ जना मानिस जोखिममा रहेको प्राधिकरणले जनाएको छ ।

लुम्बिनी प्रदेशका पहाडी जल्लाहरु पाल्पा, गुल्मी, अर्घाखाँची, प्युठान, रुकुम पूर्व पहिरोको जोखिममा रहेका छन् भने रुपन्देही, नवलपरासी, कपिलवस्तु, दाङ, बाँके र बर्दिया बाढीको जोखिममा रहेका छन् । यसैगरी सरकारले मुलुकभर मनसुनबाट १२ लाख ५४ हजार भन्दा बढी नागरिक प्रभावित हुने अनुमान गरेको छ । प्राधिकरणका कार्यकारी प्रमुख अनिल पोखरेलले मनसुनजन्य विपद्बाट नागरिकलाई जोगाउन आवश्यक तयारी भइरहेको बताए । उनका अनुसार कोशी प्रदेशमा ३,०१,१४३ घरधुरीका ६८,९११ नागरिक प्रभावित हुने अनुमान छ । यस्तै मधेस प्रदेशमा४,०३,१८० घरधुरीका ९२,२६१, बागमती प्रदेशमा ९६,८५८ घरधुरीका २२,३९३ नागरिक प्रभावित हुने अनुमान छ । यस्तै गण्डकी प्रदेशमा ६९,७४४ घरधुरीका १५,९६०, कर्णाली प्रदेशमा ३५,३३३ घरधुरीका ८,०८५ र सुदूरपश्चिम प्रदेशमा १,४७,०६० नागरिक प्रभावित हुने प्राधिकरणको अनुमान रहेको उनले बताए ।

नेपालमा सामान्यतया जेठ अन्तिम साताबाट मनसुन प्रवेश गर्दछ । जल तथा मौसम विज्ञान विभागका महानिर्देशक कमल राम जोशीले यस वर्षको मनसुन जेठ ३१ वा ३२ गते पूर्वबाट प्रवेश गर्ने सम्भावना रहेको बताए । नेपालमा मनसुन सरदर एक सय दिन क्रियाशील हुने गरेको छ ।
नेपालमा बाढी, पहिरो र भारी वर्षा प्रमुख मनसुनजन्य विपद् हुन् । यसका साथै मनुसनको अवधिमा झाडापखाला, हैजा जस्ता पानीजन्य रोग, सर्पदंश, डेंगु, मलेरियाजस्ता किटजन्य प्रकोप बढ्ने गर्छन् । नेपालमा मनसुनजन्य विपद्ले नै धेरै नागरिकलाई प्रभावित गर्छ र सबैभन्दा धेरै आर्थिक क्षति पनि निम्त्याउँछ ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।