‘डेट एक्सपाएर’ औषधी वितरण प्रकरण : गल्ती स्वीकार्दै चौराह अस्पतालले माग्यो माफी

बुटवल । गुल्मीको रेसुङ्गा गाउँपालिकामा गरिएको स्वास्थ्य शिविरमा म्याद गुज्रीएको ओषधी वितरण गरेकोमा गल्ती स्वीकार गर्दै बुटवलको चौराह अस्पतालले माफी मागेको छ । अस्पतालले म्याद गुज्रीएको औषधी वितरण गरको बारे समाचार प्रकाशन भएपछि सोमबार एक विज्ञप्ती जारी गर्दै अस्पतालले गल्ती भएको स्वीकारसहित माफी मागेको हो ।

अस्पतालद्वारा जारी विज्ञप्तीमा भनिएको छ ‘उपरोक्त सम्बन्धमा मिति २०७९ ११ २० गते रसुङ्गा नगरपालिकाको आयोजनामा चौराह अस्पताल प्रा लि. को प्राविधिक सहयोगमा महेन्द्र मावि मा गरिएको निःशुल्क स्वास्थ्य शिविरको क्रममा मिरा बायोटिक कम्पनीद्वारा उत्पादित एमिजाय १० एमजीको स्याम्पल ट्याबलेटको म्याद सकिएको औषधी वितरण गरिएको भन्ने समाचार प्रकाशित भएको प्रति दुख व्यक्त गर्दछौ । प्राविधिक कमजोरीका कारण उपचारमा आउने केहि विरामीहरुलाई उक्त औषधी वितरण भएको अस्पताल व्यवस्थापन समितिले स्वीकाछौं ।’ अस्पतालका जनसम्पर्क तथा सूचना अधिकृतद्वारा जारी विज्ञप्तीमा अघि लेखिएको छ ‘शारीरिक दुखाईमा प्रयोग गरिने औषधी प्राविधिक गल्लीको कारण मिरा बायोटिक कम्पनीको स्याम्पल एमिजोय १० एमजीको ट्याबलेट १५ देखि २० पाता वितरण भएको वितरणमा रहेका फार्मासिस्टले उल्लेख गरेका छन । यो घटनाप्रति संवेदनशिल हुँदै आगामी दिनमा यस्तो घटना नदोहोरिने प्रतिवद्धता व्यक्त गर्दछौं ।’

घटना बारे ग्लोबल आवाजले बुटवलको चौराहा अस्पताको प्राविधिक सहयोगमा आयोजित शिविरमा म्याद गुज्रीएका औषधी शिर्षकमा समाचार प्रकाशन गरेको थियो ।