अर्थमन्त्री पौडेललाई नगर प्रमुख यादवको ध्यानाकर्षण, रामग्राम स्तुपको गुरुयोजना कार्यान्वयनमा ल्याउने प्रतिवद्धता

परासी । भगवान गौतम वुद्धको एक मात्र सिंगो अस्तुधातु रहेको रामग्राम स्तुपको गुरुयोजना कार्यान्वयनमा ल्याउन रामग्राम नगरपालिकाले चासो देखाएको छ ।

नगर प्रमुख धनपत यादवले काठमान्डौ पुगेर एतिहासिक, पर्यटकिय तथा धार्मिक स्थल रामग्राम स्तुपको विकास हुन नसक्दा ओझेलमा परेको भन्दै संघिय सरकारको ध्यानआर्कषण गराएका छन् । उपप्रधान तथा अर्थमन्त्री विष्णु पौडेललाई मन्त्रालयमा ध्यानआर्कषण पत्र बुझाउदै नगर प्रमुख यादवले तत्कालै रामग्राम स्तुपको गुरुयोजना कार्यान्वयन गरी जग्गा अधिग्रहणको काम सुरु गर्न आग्रह गरेका हुन् । लुम्बिनीको गुरुयोजनाका साथ पुर्वाधार विकासको काम भईरहदा रामग्राम स्तुपमा स्थानिय सरकारले पनि काम गर्न नपाउने र संघिय सरकारले पनि सहयोग नगर्नु विडम्बना भएको भन्दै अर्थमन्त्रीको ध्यानआर्कषण गराएका हुन् ।

ध्यानआर्कषण पत्र बुझ्दै उपप्रधान तथा अर्थमन्त्री पौडेलले जग्गा अधिग्रहणको काम छिट्टै सुरु हुने प्रतिवद्धता व्यक्त गरे । रामग्राम स्तुपको बारेमा आफु जानकार रहेको बताउदै तत्कालका लागी स्तुप क्षेत्रको जग्गा अधिग्रहण गर्ने र बाँकि आवश्यक जग्गा रोक्का राख्ने योजनाका साथ काम गर्ने पौडेलले बताएका नगर प्रमुख यादवले जानकारी दिए । रामग्राम स्तुप क्षेत्रको विकासका लागी पटक पटक लुम्बिनी विकास कोष संग छलफल गरेपनि कार्यान्वयन नभएपछि संघिय सरकारको ध्यानआर्कषण गराएको उनले बताए ।

अर्थमन्त्री पौडेलले यो पटक आश्वासन मात्र होईन् काम सुरु हुन्छ तर बजेटका कारण एकैपटक काम नसकिने कुरा नगर प्रमुख यादवले बताए । साथै उनले कानुन न्याय तथा संघिय मामिला मन्त्री धुव्र बहादुर प्रधानसंग पनि भेट गरेर रामग्राम स्तुपको गुरुयोजना कार्यान्वयनमा ध्यान दिन आग्रह गरेका हुन् । जवाफमा मन्त्री प्रधानले त्यसका लागी आवश्यक सहजिकरण गरी पहल गर्ने आश्वासन दिएका छन् । सदरमुकाम परासी देखि ४ किलोमिटर दक्षिण तर्फ रहेको रामग्राम स्तुप क्षेत्रको विकास हुन नसक्दा उक्त क्षेत्र ओझेलमा परेको छ ।

विश्व सम्पदा सुचिमा समेत सुचिकृतको पर्खाईमा रहेको स्तुपाको विकासका लागी सरकारले झन्डै ७ अर्ब लागत अनुमान सहितको गुरुयोजना बनाएपनि कार्यान्वयन हुन सकेको छैन् । पटक पटक जियोफिजिक्स सर्भे मार्फत स्तुपको जोखिम क्षेत्र पुर्वाधार निर्माणका क्षेत्र, उत्खनन् गर्न सकिने स्थल पहिचान भएपनि काम नहुदा देशकै महत्वपुर्ण क्षेत्र ओझेलमा परेको हो ।