रुपन्देहीमा कांग्रेस वडा अधिवेशनको सम्पूर्ण तयारी पुरा

बुटवल । सत्तारुढ दल नेपाली कांग्रेसको आसन्न १४ औं महाधिवेशनअन्तर्गत भोलिदेखि वडा अधिवेशन प्रारम्भ हुँदैछ । कांग्रेसको केन्द्रीय निर्वाचन समितिले हालसम्म क्रियाशील सदस्यता नामावली प्रकाशित भइसकेका ५६ जिल्लाका वडाहरुमा भोलिदेखि अधिवेशन हुन लागेको जनाएको छ । समितिले सम्बन्धित जिल्लामा जिल्ला निर्वाचन अधिकृतलाई समेत खटाईसकेको छ ।

यसैबीच नेपाली कांग्रेस रुपन्देही भोलि हुने वडा अधिवेशनको तयारी जुटेको छ । कांग्रेस रुपन्देहीका सचिव रामकृष्ण खाँणले जिल्लाका १५५ वटा वडामा हुने अधिवेशनको सम्पूर्ण तयारी पुरा भएको जानकारी दिए । केन्द्रले पठाएका जिल्ला मुख्य निर्वाचन अधिकृत भेषराज घिमिरे आवश्यक सामग्रीसहित बुधबार नै रुपन्देही आईसकेका छन् ।

खाँणले वडा अधिवेशनका लागि आवश्यक प्रशिक्षण र सहजीकरण गरी सबै वडामा निर्वाचन अधिकृत खटाईसकेको बताए । उनले सर्वसम्मत नेतृत्व चयनको लागी अधिकतम प्रर्यत्न गर्ने र वडा तहमा खटिने निर्वाचनकर्मीहरु सहयोग गर्न आग्रह गरेका छन् । साथै, अधिवेशन एउटा पर्व रहेको भन्दै सबैलाइ सक्रिय रुपमा सहभागी हुन समेत आग्रह गरे ।

अधिकांश वडामा सर्वसम्मत अधिवेशन हुने र केही वडामा निर्वाचनबाट अधिवेशन टुंगिने अनुमान गरिएको उनले बताए । रुपन्देहीमा पुराना नवीकरण भएका ११ हजार र नयाँ थप भएका ११ हजार गरि करिब २२ हजार क्रियाशील सदस्य रहेका छन् ।