भरतपुरको कर अभियान शुरु

चितवन । भरतपुर महानगरपालिकाले कर अभियानको शुभारम्भ गरेको छ । लक्ष्यअनुसारको राजस्व सङ्कलन गर्नका लागि बिहिबार कर अभियानको शुभारम्भ गरिएको हो ।‘स्वच्छ, पारदर्शी र प्रविधिमैत्री कर प्रशासनः विकास समृद्धि र सुशासन’ भन्ने उद्देश्यका साथ महानगरपालिकामा कर अभियानको घोषणा गरिएको हो । कर अभियान घोषणाका क्रममा महानगर प्रमुख रेनु दाहालले समृद्ध महानगरपालिका निर्माणका लागि कर अभियान घोषणा गरिएको बताए ।

महानगरपालिकाभित्रको विकासको काम चित्तबुझ्दो भइरहेको उल्लेख गर्दै उनले महानगरको आन्तरिक आम्दानी वृद्धिका लागि कर अभियान घोषणा गरिएको जानकारी दिए । स्थानीय सरकार आएको पहिलो पाँच वर्षमा महानगरपालिकाले आन्तरिक आम्दानी बढाएर वार्षिक रु एक अर्ब पु¥याउनुपर्ने लक्ष्य रहेको दाहालले बताए । सो लक्ष्य पूरा गर्नुपर्ने महानगरलाई चुनौती रहेको जनाउँदै उनले कर अभियानमा सबैलाई सहभागी हुन आग्रह गरे ।

कार्यक्रममा महानगरपालिका उपप्रमुख एवं राजस्व परामर्श समिति संयोजक पार्वती शाह ठकुरीले महानगरपालिकाले करमैत्री नीति तथा कार्यक्रम ल्याएको बताए । पछिल्लो समय महानगरपालिकाले करको दर र दायरा सबैको सहमतिअनुसार नै बढाएको भन्दै नगरवासीको साथ र सहयोग रहने विश्वास व्यक्त गरे। स्थानीय सरकार आउनु अगाडि भरतपुरमा सीमित मात्रामा कर उठिरहेको अवस्थामा महानगर भएपछि करको दर तथा दायरा बढाइएको उनले जानकारी दिए ।

अघिल्लो आर्थिक वर्ष २०७६-७७ मा महानगरको आन्तरिक आम्दानी रु ९२ करोड भएको उल्लेख गर्दै उनले यस आव २०७७-०७८ मा रु ९० करोड सङ्कलन गर्ने लक्ष्य रहेको बताए । कोभिड–१९ का कारण राजस्व सङ्कलनको लक्ष्य थोरै राखिएको उपप्रमुख ठकुरीले बताए ।कार्यक्रममा महानगरपालिकाका निमित्त प्रमुख प्रशासकीय अधिकृत महेन्द्रप्रसाद पौडेलले राजस्वको दायरा फराकिलो बनाउने, राजस्वको क्षेत्र पहिचान गर्दै राजस्व सङ्कलन गर्नका लागि कर अभियान घोषणा गरिएको बताए । कार्यक्रममा स्थानीय जनप्रतिनिधि, उद्योग वाणिज्य सङ्घ, चितवन उद्योग सङ्घलगायतका सङ्घसंस्थाका प्रमुख तथा प्रतिनिधिको सहभागिता थियो ।