रोटरी क्लब अफ बुटवलको बैठक, कोभिड-१९ को अवस्थाबारे जानकारी

बुटवल । रोटरी क्लव अफ बुटवलको १३३९ औं नियमित बैठक शनिबार भएको छ । बैठकमा लुम्बिनी प्रदेश सामाजिक विकास मन्त्रालयका सूचना अधिकृत डा. पुष्पराज पौडेल अतिथी वक्ताको रुपमा सहभागी भएका थिए । त्यस अवसरमा उनले लुम्बिनी प्रदेश सरकारले कोभिड-१९ को उपचार, संक्रमण रोकथाम र नियन्त्रणमा चालेका प्रयासबारे जानकारी गराएका थिए ।

उनले लुम्बिनी प्रदेशमा हालसम्म २२ हजार २६७ जना कोरोना संक्रमित भएको, १९ हजार २५१ जना निको भएको र २५१ जनाको मृत्यु भएको जानकारी दिए । त्यस्तै दुईहजार ८६२ जना सक्रिय संक्रमित रहेको पनि उनले जानकारी दिए । सूचना अधिकृत पौडेलले लुम्बिनी प्रदेश सरकारले स्थापना गरेको कोभिड-१९ नियन्त्रण तथा उपचार कोषमा हालसम्म २३ करोड १८ लाख ७४ हजार रुपियाँ जम्मा भएकोमा २१ करोड ८४ लाख १० हजार रुपियाँ खर्च भएको बताए । प्रदेश सरकारले कोभिड विशेष अस्पताल, आइसोलेसन सेन्टरहरु निर्माण गरी कोरोनाको उपचार र व्यवस्थापन गरिरहेको भन्दै उनले सबैले जनस्वास्थ्यको मापदण्ड पालना गर्ने हो भने कोभिड-१९ नियन्त्रण गर्न सकिने बताए ।

त्यस अवसरमा रोटरी क्लव अफ बुटवलका प्रेसिडेन्ट नोमिनी बोनिन पिया, सचिव रोम शर्मा, कोषाध्यक्ष खिमनारायण पराजुली, पुर्व अध्यक्ष पुरन श्रेष्ठ र मणिरत्न पाण्डेले विभिन्न जिज्ञासा राखेका थिए । रोटरी क्लव अफ बुटवलका अध्यक्ष सुनिल श्रेष्ठको अध्यक्षतामा भएको भर्चुअल बैठकमा सचिव रोम शर्माले अघिल्ला बैठकका निर्णयहरुबारे जानकारी गराएका थिए भने कोषाध्यक्ष खेमनारायण पराजुली, करुण खनाल, सावि बिश्वकर्मा लगायतले आ-आफ्नो धारणा राखेका थिए ।