बुटवलका व्यवसायिक सटर टेन्डर दर्ताको विषयमा झडप

बुटवल । बुटवल उपमहानगरको स्वामित्वमा रहेको बुटवल हाटबजारका व्यवसायीक सटरको टेण्डर खोल्ने क्रममा झडप भएको छ । उपमहानगरले नियम विपरित उल्लेखित समयावधी नाघेर आएका निवेदनहरुलाई समेत दर्ता गरेको भन्दै व्यवसायीहरुले विरोध गरेका थिए ।

मध्यान्ह १२ बजे सम्मको समय निर्धारण गरेरपनि त्यसपछि आएका टेण्डरहरुलाई समेत दर्ता गरिएको भन्दै ब्यवसायीहरूले उपमहानगर घेराउ गरेका थिए । उनीहरु उपमहानगरको कार्यालय परिसरमा प्रवेश गर्न खोजेपछि झडप भएको हो । ब्यवसायीले उपमहानगरले चलखेल गरेर आफूहरूलाई हटाउन खोजेको आरोप लगाएका छन् भने उपमहानगरले १२ बजे पछि दर्ता नगरिएको बताएको छ ।

१७ वर्ष पहिले शेर्पा टि कम्पनीसँग भाडामा लिएर बसेका ब्यवसायीहरूले उप महानगरको नयाँ टेण्डर खोल्ने क्रममा अनियमितता भएको बताएका हुन् । उप महानगरपालिकाका अनुसार १७ वर्ष पहिले सार्वजनिक साझेदारी कार्यक्रम अन्तर्गत शेर्पा टि ले सटर बनाउने र १५ वर्ष भाडामा लगाई १५ वर्षपछि उप नगरपालिकामा स्वामित्व जानेगरि तत्कालीन नगरपालिकाले सम्झौता गरेको थियो । सम्झौता अनुसार २ वर्ष पहिले म्याद समाप्त भएकोमा ब्यवसायीको माग अनुसार २ वर्ष म्याद थपिएको थियो ।

यहि कार्तिक ३० गते म्याद सकिनु अघि उपमहानगरले ३० दिने सुचना प्रकाशित गर्दै टेण्डर आह्वान गरेकोमा आज टेण्डर खोल्ने कार्यक्रम रहेको थियो । ८७ वटा व्यवसायीक सटरका लागि ३ सय ४१ वटा टेन्डरमा आज मात्रै १५० बढी निवेदन दर्ता भएको उपमहानगरका वित्तिय व्यवस्थापन महाशाखाका विष्णुप्रसाद खनालले बताए । ‘व्यवसायीहरुले आरोप लगाएजस्तो नियम विपरित गएका छैनौ मध्यान्न १२ बजेसम्म तोक लगाइएका निवेदनलाई मात्रै दर्ता प्रक्रियामा लगेका हौं ।’–खनालले भने ।

तस्विर सौजन्य विष्णु घिमिरे