ताजा अपडेट »

समाचार प्रभाव : डोम परिवारलाई कोरियाबाट सुमेसको सहयोग

मंगलबार, ३० असार २०७७, १७ : ०४
4 Shares

भैरहवा । मर्चवारमा रहेको डोम परिवारबारे समाचार प्रकाशन भए पछि दक्षिण कोरियाबाट एक युवाले उनिहरुलाई सहयोग गरेका छन् । मर्चवारी गाउँपालिका वडा नम्बर २ बस्ने श्री डोम र गेना डोम बस्ने घर चुहिएर बिचल्ली भएको समाचार आए पछि अहिले बैदेशिक रोजगारको सिलसिलामा दक्षिण कोरिया रहेका सुमेश प्रजापतिले उनिहरुलाई सहयोग प्रदान गरेका छन् । सुमेशले डोम परिवारको लागी त्रिपाल, चामल, दाल, तरकारी लगायतको खाद्यन्न, कपडा लगायतको सामाग्री सहयोग गरेका हुन् ।

स्थानिय डण्डा खोलाको छेमा अस्थायी छाप्रो बनाएर बसिरहेका डोम परिवार लकडाउनको मारमा परेका थिए । मर्चवार क्षेत्रमा मृत्यु भएपछि अन्तिम संस्कारको लागी ल्याइने लाश पोल्ने र घाटको सरसफाई बापत पाएको रकमले श्री डोम आफ्नो परिवारको पेट पाल्ने गरेका थिए । पछिल्लो समय घाटमा लाश नै नआएको कारण उनको परिवार भोकभोकै बस्न बाध्य भएको थियो । यस्तै भएको अस्थायी छाप्रो समेत सबैतिरबाट चुहिने गरेको थियो । श्री डोम र उनको श्रीमति गेना डोम ५ जना बालबालिका सहित जेनतेन सोही छाप्रोमा बस्दै आएका छन् । गेना डोमले छाप्रो टाल्नको लागी १ थान त्रिपाल समेत सहयोग नपाएको गुनासो गर्दै आएकी थिईन । उनको सोही समाचार हेरेर दक्षिण कोरियाबाट सुमेशले त्रिपाल सहित खाद्यन्न र लत्ता कपडा पुग्ने गरि सहयोग गरेका हुन् ।

त्रिपाल पाए पछि श्री हर्षित भए । उनले पानी पर्दा बालबच्चाहरु समेत एउटा कुनामा ओत लाग्ने बाध्यता रहेको थियो अब भने रातभरि ढुक्क भएर सुत्न सक्ने प्रतिक्रिया दिए । “कति बर्ष भएको थियो बच्चाहरुलाई एक जोर कपडा समेत दिन सकेको थिएन अहिले सबै परिवारले नै नया नया कपडा पायौ ।” उनले भने । समाचारबाट मर्चवारको डोम परिवार समस्यामा परेको थाहा पाएर सहयोग गर्ने ईच्छा लागेका सहयोगी सुमेश प्रजापतिले बताए । उनले आफुले कमाएको रकमबाट विपन्न परिवारलाई केही राहत हुन्छ भन्ने उद्देश्यले सहयोग गरेको बताए । यस बिषयमा ग्लोबल आवाज डटकमले “लाश कुर्दै श्री र गेना” बिषयमा समाचार प्रकाशन गरेको थियो ।

https://www.globalaawaj.com/archives/43767
ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।