ताजा अपडेट »

लकडाउनले उद्योगीहरु आर्थिक संकटमा : ५० प्रतिशत ब्याज मिनाहको माग

मंगलबार, २३ असार २०७७, १८ : ०९
8 Shares

बुटवल । विश्वव्यापी कोरोना महामारीसँगै बन्दाबन्दीका कारण व्यवसायीहरु संकटमा परेका छन् । कतिपय उद्योगहरु बन्दको अवस्थामा पुगेकाले उद्योगी व्यवसायी आर्थिक रुपले संकटमा परेको रुपन्देही उद्योग संघले बताएको छ । लकडाउनको अवधीभर उद्योगहरु सञ्चालन नभएकाले व्यवसायीले बैंकको व्याज र किस्ता तिर्न नसक्ने अवस्था आएको रुपन्देही उद्योग संघका अध्यक्ष बाबुराम बोहोराले बताए ।

उद्योगी व्यवसायीहरु लकडाउनका कारण आर्थिक संकटमा परिरहेकै बेला सरकारले असार मसान्त भित्र कर दाखिला गर्नका लागि ताकेता गर्नु गलत भएको उनले बताएका छन् । संघले मँगलबार बुटवलमा पत्रकार सम्मेलन गरी ५० प्रतिशत व्याज छुट र किस्ताको भाका सरकारसँग माग गरेको छ । लकडाउन अवधीको करमा पनि छुट हुनुपर्ने व्यवासायीको माग छ । संघमा आवद्व रुपन्देहीमा सञ्चालित १२ सय बढी उद्योगहरु लकडाउनभर बन्द गर्नु परेकाले व्यवसायी संकटमा परेका हुन् । श्रमिकहरुको रोजगारीलाई निरन्तरता दिनका लागि उद्योगहरुलाई न्यूनतम व्याजदरमा पुनःकर्जा उपलब्ध गराउनु पर्ने रुपन्देही उद्योग संघको माग छ ।

संघका अध्यक्ष बोहोराका अनुसार लकडाउनका कारण सबै प्रकारका उद्योगहरु मारमा परेको र सबै भन्दा बढी होजेरी, पर्निचर, निर्माण क्षेत्रका उद्योगका साथै पर्यटन व्यवसाय ठप्प रहेका छन् । लकडाउन केही खुकुलो भएसँगै सरकारले उद्योगहरु सञ्चालन गर्न भनेपनि सरकारले भनेझै उद्योगहरु सञ्चालन गर्न नसकिएको उद्योगी व्यवसायीले बताएका छन् । रुपन्देहीमा सञ्चालित साना ठूला सबै उद्योगहरुमा काम गर्ने कामदारहरु आधाजसो भारतीय नागरिक भएको र ति भारतीय कामदार लकडाउनका कारण नफर्किएकाले उद्योग सञ्चालन गर्न नसकिएको व्यवासायीको भनाइ छ ।

नीतिगत रुपमा उद्योगी व्यवसायीका मागहरुलाई सम्बोधन गरी आर्थिक सुधारको जगलाई बलियो बनाउनु पर्ने र त्यसका लागि तत्काल उद्योगहरुका लागि आवश्यक पर्ने कच्चा पदार्थको भन्सार दर कम गर्नुपर्ने, विद्युत महशुलमा ५० प्रतिशत छुट गर्नुपर्ने व्यवसायीका माग छन् । कालोवजारी रोक्नका लागि उद्योगलाई चाहिने अतिआवश्यक वस्तुको आपूर्ति सहज बनाई उत्पादन बजारले खपत गर्न नसके राज्यले खरिद गर्नका लागि न्यूनतम ग्यारण्टी हुनुपर्ने माग गरिएको छ ।

रुपन्देहीमा सञ्चालित साना ठुला १२ सय बढी उद्योगमा काम गर्ने कामदारहरुको चैत्र महिनाको तलव पुरा दिइएको र अन्य महिनाको तलव ५० प्रतिशत उपलब्ध गराइने कुराकानी भएको संघका अध्यक्ष बाबुराम बोहोराले पत्रकार सम्मेलनमा जानकारी गराए । कूनैपनि उद्योगमा काम गर्ने मजदुरहरुले तलव नपाएको गुनासो सहितको उजुरी अहिलेसम्म संघमा नआएको समेत अध्यक्ष बोहोराले बताए ।

उद्योगीले कर, घरभाडा बैंक ब्याज, स्थानीय लगाएत सम्पूर्ण कर तिर्ने र संकटको बेला राज्यलाई आर्थिक र भौतिक सहयोग गर्ने तर, उद्योगी संकटमा पर्दा राज्यले नहेर्ने प्रवृत्तिले उद्योगीलाई थप मर्माहत बनाएको संघका महासचिव जिवकान्त काफ्लेले बताए । उनले भने ‘ रोजगार सिर्जना गरी उत्पादनद्वारा आयातलाई न्यूनिकरण गर्दै आर्थिक चलायमान बनाई राज्यलाई आर्थिक सहयोग पुयाउँदै आएका उद्योग र उद्योगीप्रति सरकार उल्टै आश्वासन मात्रै दिएर गैरजिम्मेवारी देखाई रहेको छ ।’ पत्रकार सम्मेलनमा संघका निवर्तमान अध्यक्ष गणेश अधिकारी,पूर्व अध्यक्ष एजाज आलम,पत्रकार महासंघ रुपन्देहीका उपाध्यक्ष दिनेश पाण्डे,राससका प्रदेश प्रमुख भरत केसी लगाएतको सहभागिता रहेको थियो ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।