गुल्मीमा पहिरो : २ जना वेपत्ता, क्वारेन्टिन बनाइएको विद्यालय पनि भत्कियो

गुल्मी । गुल्मीको इस्मा गाउँपालिकामा गएरातीदेखि परेका अविरल वर्षाका कारण पहिरो जाँदा २ जना वेपत्ता भएका छन् । वडा नम्बर १ को निस्तीको ढाँडफाँटमा गएराति बस्ती माथिबाट पहिरो खस्दा ९ वर्षकी बालिका अपिच्छा खत्री बेपत्ता भएकी छन् । बालिकाकी आमा २८ वर्षीय इश्वरा खत्रीलाई भने ६ घण्टापछि स्थानीयले जीवितै उद्धार गरेका छन् । पहिरोसँगै निस्ती खोलामा आएको बाढीले अस्थायी होटल पुर्दा होटलमा बास बसेका एक जना सम्पर्कबिहीन भएको गाउँपालिका अध्यक्ष लक्ष्मणबहादुर विष्टले जानकारीदिए ।

पहिरोमा परी वेपत्ता भएकी बालिकाको हजुरबुवा ६३ वर्षका टिकाबहादुर खत्री घाइते भएका छन् । गएराति झण्डै १२ बजेतिर बस्तीभन्दा पाँच सय मिटर माथिबाट पहिरो खसेको थियो । पहिरो खसेपछि त्यस क्षेत्रका एक दर्जनभन्दा बढी घरपरिवार विस्थापित भएको स्थानीयले बताएका छन् । पहिरोले बाटो अवरुद्ध भएपछि घाइते भएकाहरुको उपचारका लागि अस्पताल पुर्याउन समेत समस्या भएको गाउँपालिका अध्यक्ष विष्टले बताए । घटना स्थलमा उद्धारका लागि अहिले नेपाली सेना, सशस्त्र प्रहरी र नेपाल प्रहरी पुगेको छ ।

इस्माका अन्य वडाका बासिन्दा पनि पहिरोको जोखिममा
गाउँपालिकाको वडा नम्बर ४ मा गएरातिदेखिको वर्षा र पहिरोका कारण ७ घर परिवार विस्थापित भएका छन् । थोरे डाँडाका उनिहरुलाई कहाँ व्यवस्थापन गर्ने भन्ने विषयमा पहल भैरहेको गाउँपालिका अध्यक्ष विष्टले बताए ।

यसैगरी वडाको ढाँड भन्ने स्थानमा रहेको कालिका आधारभूत विद्यालयको भवन पूर्ण रुपमा भत्किएको छ । क्वारेन्टिका रुपमा प्रयोग गरिएको सो विद्यालयमा बसिरहेका ७ जनालाई अन्यत्र सारिएको विष्टले जानकारी गराएका छन् । यसअघि पहिरोका कारण वडाका १४ घर परिवार विस्थापित तभैसकेका छन् । यसैगरी वडा नम्बर ५ मा पनि १ घर विस्थापित हुने अवस्थामा रहेको तथा ५ घर जोखिममा रहेको उनले जानकारी दिए ।