महिला विश्वकप क्रिकेटः अस्ट्रेलिया पाँचौ पटक विश्व च्याम्पियन

काठमाडौं । भारतलाई पराजित गर्दै अस्ट्रेलियाले सातौँ संस्करणको आईसीसी टी-२० महिला विश्वकप क्रिकेटको उपाधि जितेको छ । आइतबार मेलबोर्न क्रिकेट मैदान (एमसिजी) मा भएको फाइनल खेलमा भारतलाई ८५ रनले पराजित गर्दै अस्ट्रेलिया पाँचौपटक विश्व च्याम्पियन बनेको हो ।

अस्ट्रेलियाले दिएको १८५ रनको लक्ष्य पछ्याएको भारत १९ दशमलव १ ओभरमा अलआउट हुँदै ९९ रनमै समेटिएको हो । भारतका लागि दिप्ती शर्माले सर्वाधिक ३३ रन जोडिन् । वेदा कृष्णमुर्तीले १९ रन बनाइन् भने रिचा घोशले १८ रन जोडिन् । अस्ट्रेलियाका लागि मेगान सूटले ४ विकेट लिइन् । जेस जोनासनले ३ विकेट लिइन् । यसअघि टस जितेर पहिले ब्याटिङ गर्ने निर्णय गरेको अस्ट्रेलियाले निर्धारीत २० ओभरमा ४ विकेट गुमाउँदै १८४ रन बनाएको थियो ।

अस्ट्रेलियाका लागि एलिजा हिली र बेथ मूनीले अर्धशतकिय पारी खेले । हिलीले ३९ बलमा ७५ रन बनाइन् भने मूनी ७८ रन बनाउँदै अविजीत रहिन् । यस्तै, कप्तान मेग ल्यानिङले १६ रन बनाइन् । भारतका लागि दिप्ती शर्माले २ विकेट लिइन् । यस्तै, राधा यादव र पूनम यादवले समान एकएक विकेट लिए ।

महिला क्रिकेट विश्वकपको फाइनलमा भारत पहिलो पटक पुगेको हो । अस्ट्रेलियाले भने महिला विश्वकप उपाधि चार पटक जितिसकेको छ ।