रोट्रयाक क्लब लुम्बिनी स्टार र तिलोत्तमाको संयुक्त आयोजनामा ब्याडमिन्टन र टेबलटेनिस प्रतियोगिता

बुटवल । रोट्रयाक्ट क्लब अफ लुम्बिनी स्टार्स र रोट्रयाक्ट क्लब अफ तिलोत्तमा रुपन्देहीको संयुक्त आयोजनामा महिलापुरुष ब्याडमिन्टन र टेबलटेनिस प्रतियोगिता हुने भएको छ । क्लबले बिहीबार पत्रकार सम्मेलन गरी यही वैशाख २७ गते शनिबार देविनगर व्याडमिन्टन क्लबमा प्रतियोगिता आयोजना हुने जानकारी गराएको छ । 

प्रतियोगितामा रोट्रयाक्ट र रोटरी क्लबहरुमा आबद्ध भएका सदस्यहरु सहभागी हुन पाउने कार्यक्रम संयोजक समिर पाण्डेले जानकारी दिए । ब्याडमिन्टन र टेबलटेनिस दुवै प्रतियोगतामा महिलापुरुष सिंगल र डबल गरी ४ वटा मापदण्डमा प्रतिस्पर्धा गराइने उनले बताए । दुवै प्रतियोगतामा बिजेता हुने टिमले सिंगलतर्फ नगद ३ हजार, मेडल र प्रमाणपत्र तथा डबलतर्फ ५ हजार नगद, मेडल र प्रमाणपत्र पाउने कार्यक्रम संयोजक पाण्डेले बताए । प्रतियोगितामा सहभागि हुन सिंगलतर्फ एक टिमलाई ३ सय र डबलतर्फ ५ सय शुल्क तोकिएको उनले बताए । 

प्रतियोगितामा करिब ७० वटा टिम सहभागी हुने अनुमान गरिएको रोट्रयाक्ट क्लब अफ लुम्बिनी स्टार्सका अध्यक्ष सरोज पाण्डेले बताए । दुवै प्रतियोगितामा स्वत्रन्त्र रेफ्री रहने बताउँदै विवादरहित ढंगले कार्यक्रम सम्पन्न हुने उनले बताए । प्रतियोगितामा सहभागी हुने टिमले शुक्रबार साँझसम्म नाम दर्ता गरीसक्नुपर्ने अध्यक्ष पाण्डेले बताए । एउटा क्लबबाट एक भन्दा टिम पनि सहभागी हुन पाउने तर खेलाडी क्लबको सदस्य हुनुपर्ने उनले बताए । 

खेल क्षेत्रलाई प्रोत्साहन गर्ने उद्देश्यले प्रतियोगिता आयोजना गरिएको क्लबका संस्थापक अध्यक्ष बिमल ढकालले बताए । साथै उनले प्रतियोगितामा सहभागिताका लागि आग्रह पनि गरे । प्रतियोगिता सम्पन्न गर्नका लागि ५० हजार रुपैयाँ खर्च हुने आयोजकको अनुमान छ ।