श्री स्टील्सको सहयोगमा रुपन्देहीका २ विद्यालयमा वृक्षरोपण

बुटवल । रुपन्देहीको रोहिणी गाउँपालिका ३ सेमरहवामा रहेको श्री स्टील्स प्रा.ली. को सहयोगमा रुपन्देहीका २ विद्यालयमा वृक्षरोपण गरिएको छ । रोहणी गाउँपालिका ३ धर्कधई स्थित स्प्यांगल इङ्लिस बोर्डिङ स्कूल र ओमसतिया–५, स्थित सतिया इङ्लिस बोर्डिङ स्कूलमा श्री स्टील्सको सहयोगमा ७०० विरुवा रोपिएको हो ।

श्री स्टील्सले ती दुई विद्यालयमा छुट्टा छुट्टै कार्यक्रमको आयोजना गरी मंगलबार वृक्षरोपण गरेको हो । विद्यालयको वातावरणलाई हरियाली र हरावरा वनाउन सहयोग पुगोस भन्ने उद्धेश्यले विद्यालयमा वृक्षरोपण गरिएको श्री स्टील्सका चिफ एकाउन्ट अफिसर प्रमोद प्रसादले बताए ।

‘विद्यालयको वातावरण हरियाली भएमा विद्यार्थीहरुको स्वास्थ्य अवस्था पनि राम्रो हुन्छ । यसकारणले ती विद्यालयमा विभिन्न प्रजातिका ३५०÷३५० विरुवा रोपेका हौँ ।’– उनले भने ‘यसले पक्कै पनि विद्यालयलाई हरियाली बनाउनका लागि केही मात्रामा भए पनि सहयोग पुग्ने अपेक्षा छ ।’ गुलमोहर, अर्जुना, राज ब्रिष्का, गुल चमन, अशोका, सागवान लगायतका विरुवा रोपिएको उनले बताए ।

स्प्यांगल इङ्लिस बोर्डिङमा भएको वृक्षारोपणमा श्री स्टिलका चिफ एकाउन्ट अफिसर प्रमोद प्रसाद र एडमिन अफिसर दिनेश कुमार साह, विद्यालयका प्रिन्सीपलमा सन्जय कुमार कौशल, भाइस प्रिन्सीपल कौलाशपति उपाध्यय र विद्यालयका शिक्षक शिक्षिकाहरुको सहभागिता रहेको थियो ।

यस्तै सतिया इङ्लिस बोर्डिङ स्कूलमा भएको सो कार्यक्रममा पनि चिफ एकाउन्ट अफिसर प्रमोद प्रसाद र एडमिन अफिसर दिनेश कुमार साह, विद्यालयका प्रिन्सीपल कमलेश हरिजन, भाइस प्रिन्सीपल श्याम सुन्दर हरिजन लगायत विद्यालयका शिक्षक शिक्षिकहरुको सहभागिता रहेको थियो ।

स्प्यांगल इङ्लिस बोर्डिङ र सतिया इङ्लिस बोर्डिङले आफ्नो विद्यालयमा वृक्षरोपण गरेकामा श्री स्टील्स कम्पनीलाई धन्यवाद दिएका छन् ।