तिलोत्तमाको शंकरनगर दुर्गादत्त माविमा अन्तर बाल समूह वत्तृत्वकला प्रतियोगिता

बुटवल । रूपन्देहीको तिलोत्तमा २ को शंकरनगर दुर्गादत्त माविमा अन्तर बाल समूह वत्तृत्वकला प्रतियोगिता सम्पन्न भएको छ । बालमैत्री घोषणा दिगोपना र हाम्रो दायित्व विषयक वत्तृत्वकला प्रतियोगिता आइतबार सम्पन्न भएको हो । प्रतियोगितामा शंकरनगर दुर्गादत्त मावि बाल समूहका हर्षिता घिमिरे प्रथम भएकी छन् ।

त्यस्तै जनजाग्रति बाल समूहक नवीन न्यौपाने दोस्रो र लालीगुराँस बाल सञ्जालका मनिषा घिमिरे तेस्रो भएकी छन् । प्रतियोगितामा तिलोत्तमा नगरपालिका वाड नम्बर २ मा रहेका १२ वटा बाल सञ्जाल समूहका १३ जना विद्यार्थीले प्रतिष्पर्धा गरेको विद्यालयले जनाएको छ । अविभावक संघका केन्द्रीय सदस्य लोकनाथ ज्ञवालीले कुनै पनि प्रतियोगिताबाट पुरस्कृत मात्रै नभई केही न केही सिकाइ हुने बताए । तिलोत्तमा नगरपालिका वाड नम्बर २ का सदस्य डोर बहादुर थापाले पढाइसँगै बोलीको पनि विकास गर्न जरूरी रहेकोमा जोड दिए ।

बालमैत्री सहजकर्ता रमा थापाले बालबालिकाको हक अधिकारका लागि कस्ता कार्यक्रम उचित हुन्छन् बालबालिकाले माग गर्नुपर्ने बताइन । शिक्षक अविभावक संघका अध्यक्ष पुष्करनाथ पन्थले विद्यार्थीले विद्यालयमा मात्रै नभएर घरमा पनि आफ्नो अधिकार , जिम्मेवारी र दायित्व बुझ्न जरूरी रहेको बताए । वडा बालमैत्री सञ्जाल अध्यक्ष अस्मिरा सुनारको स्वागत रहेको कार्यक्रममा विद्यालयका प्रधानाध्यापक चण्डी प्रसाद पाण्डेले कार्यक्रमको बारेमा प्रकाश पारेका थिए ।

विद्यालय व्यवस्थापन समिति अध्यक्ष उमानाथ कडेलको अध्यक्षता रहेको कार्यक्रमको सञ्चालन शिक्षकहरू कृष्ण पन्थी र गंगा पुरीले गरेका थिए ।