भैरहवा । सिद्धार्थनगर नगरपालिकाको आयोजनामा चैत्र २२ गते देखि भैरहवामा मेयर कप क्रिकेट प्रतियोगिताको आयोजना हुदैछ ।

सिद्धार्थनगर नगर पालिकाका प्रमुख प्रशासकिय अधिकृत नवराज पौडयालका अनुसार टि ट्वाईन्टी फर्मेटमा खेलाईने उक्त प्रतियोगितामा नगरका १३ वटै वडाका टिमहरुले सहभागीता जनाउदै छन् । भैरहवामा रहेको सिद्धार्थ क्रिकेट रङ्गशालामा आयोजना हुने प्रतियोगिताको प्रथम हुनेले नगद ५१ हजार रुपैया, दोश्रो हुनेले २५ हजार प्राप्त गर्ने पौडयालले बताए ।

यस्तै प्रतियोगिताको म्यान अफ द सिरिजले ११ हजार, उत्कृष्ट बलर र ब्याट्सम्यानले ५/५ हजार तथा प्रत्येक खेलमा एक जना म्यान अफ द म्याचलाई नगद १ हजार रुपैया प्रदान गरिने उनले बताए । यस बाहेक प्रतियोगिताको आकर्षणको रुपमा ह्याट्रिक विकेट र छक्का हान्ने खेलाडीलाई पनि १ हजार १ सय रुपैयाको दरले पुरस्कृत गरिने पौड्यालले बताए।

सुरु देखि नै मेयर कप हुदै आए पनि कोभिडको कारण केही बर्ष देखि प्रतियोगिता हुन सकिरहेको थिएन । सोही प्रतियोगितालाई निरन्तरता दिन तथा नगर स्तरमा क्रिकेटका खेलाडी उत्पादन गर्ने लक्ष्य सहित मेयर कप आयोजना गरिएको नगर प्रमुख ईस्तियाक अहमद खाँनले बताए ।

नगरपालिकाकी उप–मेयर उमा अधिकारीले आगामी दिनमा महिला खेलाडीहरुलाई प्रोत्साहित गर्ने गरि बिद्यालय स्तरिय उप–मेयर कपको पनि आयोजना गर्ने तयारी भईरहेको बताइन ।