अर्जै गुल्मी-रुपन्देही सम्पर्क समाजद्वारा बुटवलमा रक्तदान

बुटवल । अर्जै गुल्मी-रुपन्देही सम्पर्क समाजको आयोजनामा रक्तादन कार्यक्रम सम्पन्न भएको छ । बजारमा रगतको माग बढ्दो भएका कारण सामाजिक उत्तरदायित्व अनुसार रक्तदान कार्यक्रमको आयोजना गरिएको समाजका अध्यक्ष यमबहादुर अर्यालले बताए । रक्तसञ्चार केन्द्र बुटवलको प्राविधिक सहयोगमा आयोजना गरिएको रक्तदान कार्यक्रममा ५५ जनाले रक्तदान गरेको कार्यक्रम संयोजक समाजका उपाध्यक्ष रेशम भण्डारीले बताए ।

कार्यक्रममा समाजका अर्का उपाध्यक्ष मनोज गौतमले अहिले पनि रगत दिन धेरैले आनाकानी गर्ने गरेको बताउंदै रक्तदान जीवनदान हो भन्ने जागरण पैदा गर्नका लागि पनि समाजले रक्तदान कार्यक्रम गर्दै आएको बताए । समाजले यस अघि अप्ठ्यारामा परेकाहरुलाई सहयोग, विभिन्न आश्रममा खाद्यान्न सहयोग, सरसफाई, पारिवारिक मिलन जस्ता कार्यक्रम गर्दै आएको भन्दै उनले सामाजिक उत्तरदायित्व अनुसार रक्तदान कार्यक्रम गरेको बताए ।

समाजका सह सचिव रामचन्द्र अर्याल (आर.सी)ले हरेक व्यक्ति १८ वर्ष पूरा भएपछि आफ्नो जन्मदिनमा हरेक वर्ष रक्तादान गरे बजारमा रगतको अभाव नहुने र धेरैको अकालमा मृत्यु हुनबाट बचाउन सकिने बताए ।गुल्मी जिल्लाको मालिका गाउंपालिका वडा नं. ६ अर्जैबाट विभिन्न पेशा व्यवसाय एवं स्थायी रुपमा बसोबास गर्नेहरु बीच आपसी भाईचाराको विकास गर्ने उद्देश्यले गठन भएको समाजले वार्षिक कार्योजना अनुसार विभिन्न कार्य गर्दै आएको छ । रक्तदान कार्यक्रमको सञ्चालन समाजका सचिव ओमप्रसाद अर्यालले गरेका थिए ।