सामुदायिक विद्यालयमा विद्यार्थी उपस्थिती बढाउन प्रति विद्यार्थी दैनिक दश रुपैयाँ

परासी । पश्चिम नवलपरासीको रामग्राम नगरपालिकाले सामुदायिक विद्यालयमा विद्यार्थि उपस्थिती बढाउन हाजिरीको आधारमा विद्यार्थिलाई नगद छात्रवृत्ति वितरण गर्न सुरु गरेको छ । शुक्रबार नगर प्रमुख धनपत यादवले रामग्राम १५ शुक्रौलीमा रहेको जनता मावि बाट विद्यार्थिलाई उपस्थितीको आधारमा दिईने मेयर छात्रवृत्ति नगद अनुदान कार्यक्रमको सुरुवात गरेका छन् ।

बाल विकासदेखि कक्षा ५ सम्म अध्ययनरत नगर भित्रका सबै विद्यालयका बालबालीकालाई उपस्थितीको आधारमा दैनिक दश रुपैयाँका दरले नगद प्रदान गरिने छ । सानो कक्षा बाटै विद्यार्थि विद्यालयमा अनुपस्थित हुदा बालबालिकाको सिकाईमा असर परेको र शिक्षक अभिभावक बिच पनि दुरी बढेकाले यस्तो कार्यक्रम सुरु गरिएको नगर प्रमुख यादवले बताए ।

गरिव विपन्न वर्गका बालबालीका अध्ययन गर्ने सामुदायिक विद्यालयको शैक्षिक सुधार आफ्नो मुख्य प्राथमकिता रहेको बताउदै उनले सामुदायिक विद्यालयको शिक्षामा सुधार ल्याउन अभिभावकहरु पनि जिम्मेवार बन्नुपर्ने बताए। आफ्ना बालबालीकाका पढ्ने विद्यालयको अवस्था, शिक्षकको उपस्थितीका विषयमा अभिभावकले चासो दिए शैक्षिक सुधार गर्न सकिने बताए ।

नगरपालिकाले अब बालबालीकाको क्षमता विकास गर्न सबै मावि स्तरका विद्यालयमा अतिरिक्त क्रियाकलाप सम्बन्धि अध्ययन गराउन एक एक जना शिक्षक नियुक्त गर्न लागेपनि नगर प्रमुख यादवले जानकारी दिए । सो क्रममा वडा नम्बर १५ का वडा अध्यक्ष धनपत यादवले सामुदायिक विद्यालयको शिक्षामा सुधार ल्याउनुपर्ने बताउदै यसका लागी सबै तनमनले लाग्नुपर्नेमा जोड दिएका छन् ।

कार्यक्रममा नगर शिक्षा अधिकारी रुद्र प्रसाद रेग्मि, विद्यालय व्यवस्थापन समितिका अध्यक्ष ब्रह्रमदेव सिंह, प्रधानअध्यापक चन्द्रमणी लम्साल लगाएतले बताए । सो विद्यालयमा आजै कक्षा पाँच सम्मका बालबालीकालाई पाँच महिनाको उपस्थितीको आधारमा नगद प्रदान गरिएको छ । नगरपालिकाले चालु आर्थिक वर्षको निति तथा कार्यक्रम र बजेटमा यो कार्यक्रम समावेश गरेर लागु गरेको हो ।

रामग्राम नगर भित्र १० ओटा मावि सहित कुल ३२ ओटा सामुदायिक विद्यालय रहेका छन् । ति विद्यालयमा बालविकासका १ हजार १ सय ४६ सहित कक्षा ५ सम्म ४ हजार ६ सय ८९ विद्यार्थि अध्ययनरत रहेका छन् ।