सरकारको गलत नीतिले १२ अर्ब लगानीका ५ ठूला उद्योग बन्द, दुई हजार मजदुर बेरोजगार

रुपन्देही । सरकारको गलत अर्थनीतिले रुपन्देहीका उद्योग कलकारखाना बन्द हुने अवस्थामा पुगेका छन् । अर्थमन्त्री जनार्दन शर्माले बजेटमा नेपाली स्टिल उद्योग प्रभावित हुनेगरी अन्तशुल्कको विषय समेटेपछि यहाँ व्यवसायी मर्कामा परेका हुन् । अर्थमन्त्रीको गलत कदमले गृहमन्त्री बालकृष्ण खाँणलाई समेत यसको प्रभाव पर्ने देखिएको छ । खाँणकै निर्वाचन क्षेत्रमा पर्ने करिब १२ अर्ब लगानीका ५ ठूला स्टिल उद्योग बन्द भएका छन् । चालु बजेटमा यी उद्योगलाई प्रभाव पार्नेगरी अन्तशुल्क समेटिएपछि संकटमा आएको र सरोकारवाला सबै क्षेत्रमा समस्या समाधानका लागि पुगेपनि कुनै निकास नकिस्केपछि बन्द भएको उद्योगीको भनाइ छ । चुनावको मुखैमा आफ्ना क्षेत्रका अर्बौ लगानीका उद्योग बन्द भएपछि गृहमन्त्रीलाई चुनौती थपिएको हो । यी उद्योगमा करिब दुई हजार मजदुर रहेकाले पनि उनीहरु बेरोजगार भएपछि संकट थपिएको हो ।

भारत तथा तेस्रो मुलुकबाट कच्चा ब्लेड आयात गरी स्टिल (छड) बनाउँदै आएका रुपन्देहीको पञ्चकन्या स्टिल, एभरेष्ट रोलिङ इन्डस्ट्रिज, एसआर स्टिल, फेरो स्टिल र गोयन्का स्टिल पूर्णरूपमा बन्द भएका छन् । सरकारले स्टिलको कच्चापदार्थ एमएस ब्लेड तथा स्पञ्ज आइरन आयातमा बजेटमार्फत भन्सार तथा अन्तःशुल्कमा ल्याएको विभेदकारी नीतिका कारण उत्पादन लागत बढ्दै गएपछि उद्योग बन्द गर्नुपरेको उद्योगीहरूको भनाइ छ । पाँच उद्योग बन्द हुँदा यसमा प्रत्यक्ष तथा अप्रत्यक्षरूपमा आश्रित करिब दुई हजार मजदुर बेरोजगार हुने अवस्थामा पुगेका छन् ।

सरकारले स्पन्ज आयात तथा बिलेट निर्यातमा विभेदकारी नीति ल्याएको बताउँदै उद्योगीहरू लामो समयदेखि असन्तुष्ट रहेका थिए । उत्पादन लागत बढेको र बजारमा तुलनात्मक प्रतिस्पर्धा गर्न नसकेपछि रुपन्देहीका पाँच स्टिल उद्योग बन्द भएका हुन् । कोभिडका कारण सतहमा आएका उद्योगहरू विस्तारै गति लिने क्रममा रहेकै अवस्थामा स्टिल उद्योगमा फरक नीतिका कारण उद्योगीहरूलाई व्यवसाय गर्न बञ्चित गरेको उद्योगीहरूको आरोप छ । उनीहरुले यो विषयमा आफ्नो क्षेत्रबाट सरकारमा प्रतिनिधित्व गरेका गृहमन्त्री बालकृष्ण खाडलाई जानकारी गराउँदा अर्थमन्त्रीले यो विषयमा गलत गरेको र सच्चाउन पहल गर्ने प्रतिवद्धता गरेका थिए । तर उनले यसो भने पनि यसको समाधानका लागि कुनै उपयुक्त उपाय भने निकाल्न सकेनन् ।

भैरहवा क्षेत्रमा पञ्चकन्या, एभरेष्ट, एसआर, गोयन्का, रत्न, फेरो, काठमाडौं स्टिललगायतका उद्योगले अन्तःशुल्क तथा भन्सार शुल्क वृद्धि तत्काल फिर्ता लिन माग गर्दै आएका थिए । यस क्षेत्रमा श्री स्टिल सबैभन्दा ठूलो र बढी क्षमताको उद्योग रहेको छ । त्यसैगरी स्पञ्ज आइरनबाट सञ्चालित अम्बे स्टिल र लक्ष्मी स्टिलसमेत छन् । उद्योगहरू धमाधम बन्द हुन थालेपछि यहाँ काम गरिरहेका कामदारहरू चिन्तित भएका छन् । एसआर स्टिल गत साउनदेखि बन्द भएको हो भने एभरेष्ट रोलिङ इन्डस्ट्रिज यही असोज पहिलो सातादेखि बन्द भएको हो । पञ्कन्याले पनि आफ्नो उत्पादन एक महिना अगाडिदेखि बन्द गरेको छ ।

सरकारको नीतिका कारण लागत बढ्न गएको, स्पञ्ज आइरनसँग सम्बन्धित उद्योगसँग बिक्री मूल्यमा प्रतिस्पर्धा गर्न नसकिएको र बजारमा स्टिलको माग पनि कम हुँदै गएपछि एक महिनादेखि स्टिल उत्पादन नै बन्द गर्नुपरेको पञ्चकन्या समूहअन्तर्गतका उद्योगका महाप्रबन्धक देवेन्द्र साहुले बताए । ‘हामीले यो अवस्थाका विषयमा सरोकारवा सबैलाई धेरैपटक ध्यानाकर्षण गराऔं, गृहमन्त्रीलाई उहाँकै क्षेत्र भएकाले भेटेरै भन्यौं, उहाँले यो गलत भएको भनेर हामीलाई भन्नुभयो, तर बजेट नै पास भइसकेकाले कुनै समाधानको उपाय देखिएन’ उनले भने । महाप्रबन्धक साहुले भने– ‘तयारी वस्तुमा लिइने अन्तःशुल्क भन्सार विन्दुमै कच्चा सामग्री ल्याउँदा लिने नीति खारेज गर्नुपर्यो, हाम्रो माग हो, भन्सार शुल्क बराबर गर्नुप¥यो, संसदीय समिति पनि आएर अनुगमन गरेको थियो, सबै विभागीय मन्त्रालयमा ध्यानाकर्षण गराइएको थियो तर समाधान भएन ।’

‘सबै दलका नेता तथा मन्त्रीलाई समस्या देखाएका हौं, समाधान हुने कुनै आधार देखेनौं, करिब ६ सय कर्मचारी छन्, चल्नै नसकेपछि तत्कालका लागि बिदा दिइएको छ’– उनले भने । एसआर गु्रपले सञ्चालन गर्दै आएको एसआर स्टिल इन्डस्ट्रिज साउनदेखि बन्द भएको छ । दैनिक दुई सय टन टिएमटी स्टिल उत्पादन गर्दै आएको यो उद्योग २०६८ सालमा स्थापना भएको हो ।

एसआर स्टिलका प्रबन्ध निर्देशक इन्जिनियर सुरज उप्रेतीले रहरले नभई बाध्यताले उद्योग बन्द गर्नुपरेको बताए । एकै प्रकृतिका कच्चा वस्तु आयात गर्दा फरक दर साथै कच्चा फलाम (एमएस ब्लेड)को भन्सार विन्दुमै अन्तःशुल्क लगाउन थालेपछि उद्योग सञ्चालन गर्नै नसक्ने अवस्था आउँदा साउन महिनादेखि नै बन्द गरेको प्रबन्ध निर्देशक उप्रेतीले जानकारी दिए । ‘सरकारको नीतिपछि स्पञ्ज तथा फलामका कबाड (पत्रु) गलाएर ब्लेड बनाउने उद्योगहरूलाई फाइदा पुगेको छ भने प्रत्यक्षरूपमा हामी ब्लेड आयात गरी उद्योग चलाउनेहरु नोक्सानीमा प¥यौँ, जसकारण उद्योग बन्द गर्नुको विकल्प रहेन’, उप्रेतीले भने, ‘त्यस्तै आर्थिक मन्दी, ऋणमा कडाइ, पूर्वाधार विकासका काममा कमी, माग नभएको लगायतले पनि उद्योगहरू चल्न सकेनन् ।’

सरकारले बजेटमा स्पञ्ज आइरन आयात गर्दा शून्य प्रतिशत तथा ब्लेडमा पाँच प्रतिशत भन्सार शुल्क लिने नीति ल्याएको थियो भने एमएस ब्लेड आयातमा भन्सार विन्दुमै प्रतिकेजी तीन रुपैयाँ ५० पैसा अन्तःशुल्क कायम गरेको थियो । स्पञ्ज आइरनमा भने अन्तःशुल्क पूर्ण मिनाहा भएको उद्योगीहरू बताउँछन् ।

सरकारको यही विभेदकारी नीतिका कारण उद्योग बन्द हुने अवस्था आएको बताउँछन् रुपन्देहीको एभरेष्ट रोलिङका प्रबन्ध निर्देशक अरुण गोयन्का । ‘एकै प्रकृतिका सामानमा सरकारले फरक फरक दर कायम ग¥यो, स्पञ्ज आइरनमा आधारित उद्योगहरूसँग प्रतिस्पर्धा गर्न सकिएन’, गोयन्काले भने, ‘त्यसैले घाटामा उद्योग सञ्चालन गर्नुको साटो बन्द गर्ने निर्णय लिनु प¥यो ।’ गोन्यकाले स्पञ्ज ल्याएर ब्लेड बनाउने उद्योगले भारतबाट आयात हुने ब्लेडभन्दा सस्तोमा दिन्छौँ भनेर दाबी गरेको तर दाबीअनुसारको सामान नदिएको बताए ।

एभरेष्ट रोलिङ उद्योगले दैनिक एक सय ५० टन टिएमटी स्टिल उत्पादन गर्दै आएको थियो भने सेक्सन आइटम पनि उत्पादन गरिरहेको थियो । नेपालको पहिलो स्टिल उद्योग हिमाल हो भने दोस्रो स्टिल उद्योग एभरेष्ट रोलिङ हो । उद्योगीको व्यापक विरोधपछि केही समयअघि सरकारले स्पञ्ज आइरनमा एक प्रतिशत भन्सार महसुल कायम गरेको थियो भने एमएस ब्लेडको अन्तःशुल्क एक रुपैयाँ घटाई दुई रुपैयाँ ५० पैसा कायम गरेको थियो ।

दैनिक प्रयोजनमा प्रयोग हुने ह्यान्ड पम्प, ढकलगायत फलामे सामान र मेसिनरी पार्ट्सहरू रुपन्देहीमै बनाउँदै आएको रत्न आइरन इन्डष्ट्रिज पनि बन्द भएको छ । वि.सं २०४० मा भैरहवा पडसरीमा सञ्चालित काष्ट आइरनमा आधारित यो उद्योगबाट वार्षिक पाँच सय टन बराबरका सामान उत्पादन हुँदै आएको थियो । स्टिल उद्योगहरू धमाधम बन्द हुनुमा सरकारको नीति नै गलत रहेको सिद्धार्थ उद्योग वाणिज्य सङ्घका अध्यक्ष भीष्म न्यौपाने बताउँछन् । ‘जबसम्म उद्योग तथा औद्योगिक क्षेत्र मैत्री नीति आउँदैन अन्य उद्योगहरू पनि बन्द हुन्छन्’, उनले भने, ‘कोरोनाले धरासायी भएका उद्योगहरूलाई सरकारले सहुलियत दिनुपर्नेमा उल्टै च्याप्दै जाँदा समस्या बढिरहेको छ ।’

यी पाँचवटै उद्योगमा प्रत्यक्ष र अप्रत्यक्ष गरी करिब दुई हजार कामदार प्रभावित हुने एभरेष्ट रोलिङका प्रबन्ध निर्देशक गोयन्का बताउँछन् । उनले उद्योग बन्द भएपछि केही कामदारलाई बिदा दिएर न्यूनतम कर्मचारीलाई मात्र उद्योगमा राखिएको बताए । तिहारपछि उद्योगले ठूलो परिमाणमा कामदार कटौती गर्ने तयारी गरेपछि कामदारहरुमा थप अन्यौलता बढेको छ ।

रुपन्देही उद्योग संंघका अध्यक्ष माधव पौडेलले बजेट र मौद्रिक नीतिमा यी उद्योगहरुलाई धरासायी बनाउनेगरी अन्तशुल्क राखिएकाले यस्तो अवस्था आएको र पटक पटक विभागीय मन्त्रलय र निकायहरुमा ध्यानाकर्षण गराइएपनि समाधान नभएपछि अर्बौंं लगानीका उद्योगहरु बन्द भएको बताए । ‘एकातिर सरकारी नीतिमा यस्तो अवस्था आयो अर्कोतिर ८ प्रतिशतमा कर्जा लिएका उद्योगीलाई अहिले बैंकले १८ प्रतिशतसम्म पुराएको अवस्था छ, कसरी चल्ने उद्योगहरु, यी मात्रै होइन धेरै उद्योग बन्द हुने अवस्थामा पुगिसकेका छन्’– पौडेलले भने ।