शान्ति समाजद्वारा २ पुरस्कार स्थापना

काठमाडौं । मानव अधिकार तथा शान्ति समाजले स्रष्टा सम्मान अभियानअन्तर्गत ‘मानवबहादुर रावल वातावरण स्रष्टा सम्मान र पद्यप्रसाद दाहाल स्रष्टा सौगात’ गरी थप दुई पुरस्कार स्थापना गरेको छ । त्यसअन्तर्गत प्रत्येक वर्ष साहित्यका विभिन्न विधामा योगदान गरेका दुई जना स्रष्टा लाई जनही रु २० हजार नगदसहित सम्मानपत्र प्रदान गरिने सभापति गोविन्द खनालले जनाकारी दिए ।

उक्त पुरस्कारहरु स्थापनार्थ अक्षय कोषका लागि स्व मानबहादुर रावलका छोरा मानव अधिकार तथा शान्ति समाजका उपसभापति कृष्णबहादुर रावलले रु दुई लाख र स्व पद्यप्रसाद दाहालका नातिनी तथा नातिहरुले दुई लाख शान्ति समाजलाई प्रदान गर्ने भएका छन् ।

ती पुरस्कार हरेक वर्ष महाकवि लक्ष्मीप्रसाद देवकोटा जन्मजयन्तीको सेरोफेरोमा यसैवर्षदेखि प्रदान गरिने छ । यससँगै स्रष्टा सम्मान अभियानअन्तर्गत शान्ति समाजद्वारा स्थापित पुरस्कारको सङ्ख्या १३ पुगेको छ । रासस