लुम्बिनी विश्वविद्यालयको छात्रावास र आवास डुव्यो, शिक्षक र विद्यार्थी १० घण्टादेखि बन्धक

बुटवल । लुम्बिनी बौद्ध विश्वविद्यालयको छात्रावास र शिक्षक आवास क्षेत्र डुवानमा परेको छ । निरन्तर परेको पानीले रुपन्देहीको खडैयामा रहेको आवास र छात्रावास क्षेत्र डुबेको हो । आवास क्षेत्रमा ३० जना शिक्षक, विद्यार्थी र अन्य व्यक्तिहरु फसेका छन् । दानव नदीमा उच्च बाढी आएपछि आवास क्षेत्रसहित खडैया गाउ नै डुबानमा परेको छ ।

बौद्ध विश्वविद्यालयका निमित्त परीक्षा नियन्त्रक इन्द्र काफ्लेले विहान ७ बजेपछि दानव नदिमा बाढी आउदा गाउँ नै डुवानमा परेको बताए । ‘अहिले खोला र बस्तीको पानी सम्मै छ, कोही पनि बाहिर निस्किन सक्ने अवस्था छैन, उनले भने । विश्वविद्यालयको छात्रावासमा विद्यार्थी बस्दै आएका छन् । पूर्वाधार निर्माण गरिरहेका मजदुरहरु पनि सोही भवनमा आश्रय लिएका छन् । उनीहरुको अस्थायी क्याम्प डुबेको छ ।

विश्वविद्यालयका रजिष्ट्रार डा. तिलकराम आचार्यले पानीको सतह नघटे उद्धारको प्रयास गर्नुपर्ने बताए । ‘नदीको पानी नै पसेका कारण पानीको सतह घटिरहेको छैन, पानी नघटे उद्धार नै गर्नुपर्ने हुन्छ, बाहिर निस्किनका लागि अरु कुनै विकल्प छैन, उनले भने । शिक्षकहरु थुनिएपछि विश्वविद्यालयको पठनपाठन समेत अवरुद्ध भएको उनले बताए ।

रुपन्देहीमा बिहिबार विहानदेखि नै निरन्तर पानी परिरहेको छ । निरन्तरको बर्खापछि ससाना खोलाहरुमा पानीको सतह बढेको छ । लुम्बिनी क्षेत्रका अधिकांश क्षेत्र जलमग्न भएका छन् । बाढीले लुम्बिनी प्रदेशका तराई क्षेत्रमा बढी क्षति गरेको छ । पश्चिम नवलपरासी सदमुकाम डुवानमा छ । रुपन्देहीको देवदहमा पुल भासिदा पूर्व पश्चिम राजमार्ग अवरुद्ध भएको छ । कपिलवस्तुका दक्षिणी क्षेत्रको अधिकांश खेती र ससाना घरहरु डुवानमा परेका छन् ।