बुटवल । लुम्बिनी प्रदेशमा गठबन्धन दलले सरकार गठनका लागि प्रदश प्रमुख अमिक शेरचन समक्ष दाबी पेश गर्दै छन् । माओवादी केन्द्र सहितको ४ दलिय गठबन्धनले दाबी पेश गर्न अहिले विहान साढे १० बजे जाने कार्यक्रम रहेको नेपाली कांग्रेस संसदीय दलका नेता फखरुद्दिन खानले बताए ।
माओवादी संसदीयदलका नेता कुलप्रसाद केसी सोनामको नेतृत्वमा प्रदेश सरकार गठन गर्ने गरि दाबी पेश गर्नेछन् । प्रदेश प्रमुख शेरचनले हिजो एक विज्ञप्ति जारी गर्दै आज ३ बजे सम्ममा सरकार गठनका लागि दाबी प्रस्तुत गर्न आह्वान गरे थिए । केसीको नेतृत्वमा बन्ने सरकारले आजै सानो आकारको मन्त्रिमण्डल बनाउने तयारी गरेको कांग्रेस नेता खानले बताए । सरकारमा नेपाली कांग्रेस, माओवादी केन्द्र र जनता समाजवादी पार्टीबाट एक एक जना मन्त्रिमण्डलमा जाने छन् भने राष्ट्रिय जनमोर्चाले सरकारमा सहभागी हुने बारे आधिकारीक धारणा बनाइसकेको छैन ।
संविधानको धारा १६८ को उपधारा २ अनुसार ४ दलको सिफारिसमा माओवादी केन्द्रका नेता केसी मुख्यमन्त्री हुने पक्का भएको छ । एमाले सांसद तथा एमाले नेतृत्वको सरकारका प्रवक्ता बैजनाथ चौधरीले आफूहरु प्रतिपक्षमा रहने बताएका छन् । प्रदेश प्रमुखले आजै मुख्यमन्त्री नियुक्त गर्ने र आजै सपथ समेत गराउने तयारी छ । लुम्बिनी प्रदेशसभाका हाल ८० सांसद बहाल रहेकोमा बहुमतका लागि ४१ सिट आवश्यक पर्दछ । ४ दलीय गठबन्धनसँग कांग्रेसका १९, माओवादीका १८, जसपाका ३ र जनमोर्चाका १ गरी ४१ सांसद छन् ।
यसअघि लुम्बिनीका मुख्यमन्त्री पोखरेलविरुद्ध विपक्षी गठबन्धनले प्रदेश प्रमुखसमक्ष विशेष अधिवेशन माग गर्दै संसद सचिवालयमा अविश्वासको प्रस्ताव दर्ता गरेका थिए । अविश्वासको प्रस्ताव आएपछि मुख्यमन्त्री शंकर पोखरेलले हिजो राजीना दिएका हुन् । संविधानको धारा १६८ को १ अनुसार गठन भएको सरकार विरुद्ध गठबन्धन दलहरुले अविश्वासको प्रस्ताव पेश गरेपछि नेकपा एमालेले यसलाई असंवैधानिक भन्दै आएको छ । सरकार गठन भएको २ वर्षसम्म अविश्वासको प्रस्ताव ल्याउन नमिल्ने भए पनि नव नियुक्त प्रदेश प्रमुख र प्रदेशसभाका सभामुखले राजनीतिक स्वार्थ अनुरुप काम गरेको भन्दै एमालेले असन्तुष्टि व्यक्त गरेको छ ।
युनिकोड
मिति रूपान्तरण
ग्लोबल आवाज
प्रतिक्रिया