नवलपरासीमा थप १५ दिन निषेधाज्ञा

पश्चिम । नवलपरासीमा कोरोना संक्रमण ह्वात्तै बढेपछि १० दिन देखि जारी निषेधाज्ञा १५ दिन थप गरिएको छ । कोभिड १९ संकट व्यवस्थापन केन्द्रको बैठकले शुक्रबार रातिदेखि जेठ १५ गते सम्म निषेधाज्ञा लम्ब्याउने निर्णय गरेको प्रमुख जिल्ला अधिकारी धर्मेन्द्र कुमार मिश्रले बताए । समुदायस्तरमा समेत संक्रमण फैलिएको पाईएकाले जिल्लामा निषेधाज्ञालाई थप कडा पार्ने बैठकले निर्णय गरेको छ ।

निषेधाज्ञको अवधिमा हप्तामा तिन दिन संञ्चालनमा रहेको बैंक तथा वित्तिय संस्थामा सेवाग्राहिको चाप बढेपछि अब देखि पूर्ण रुपमा बन्द भएका छन् । जिल्लामा कोरोना संक्रमितको मृत्यु हुने क्रम बढेपछि प्रशासनले प्रहरी परिचालन बढाउने र अत्यावश्यक काम बाहेक हिडडुँल गर्न नदिने तयारी गरेको छ । साथै अत्यावश्यक वस्तु वा सेवा मध्ये औषधी, इन्धन, पानी मात्र विक्रि गर्ने तथा स्वास्थ्य सामाग्री विक्री वितरण गर्ने पसल व्यवसाय बाहेक कुनैपनि पसल व्यवसाय सञ्चालन नगर्न भनिएको छ ।

सिमा क्षेत्रमा जनपथ र शसस्त्र प्रहरीको संयुक्त गस्ती मार्फत आउजाउ पूर्ण रुपमा बन्द गर्ने प्रशासनले जनाएको छ । यसअघि जिल्लामा बैशाख २१ गते रातिदेखि १० दिनका लागी निषेधाज्ञा जारी गरिएको थियो । जिल्लामा कोरोना संक्रमणमा कमि नआएपछि प्रशासन निषेधाज्ञा थप कडा बनाउने तयारीमा छ । पश्चिम नवलपरासीमा कोरोनाका सक्रिय संक्रमितको सङख्या १२ सय नाघेको छ ।