प्राबिधिकले राजिनामा दिएपछि धौलागिरी अस्पतालमा भिडियो एक्सरे सेवा प्रभावित

बागलुङ । बागलुङको धौलागिरी अस्पतालामा कार्यरत रेडियोलोजिष्टले राजीनामा दिएपछि अस्पतालमा भिडियो रेक्सेरे सेवा प्रभापवत बनेको छ । अस्पतालका रेडियोलोजिस्ट अजय पोखरेलले राजीनामा दिएपछि भिडियो एक्सेरे सेवा प्रभावित बनेको मेडिकल सुपरिटेण्डेन्ट शैलेन्द्र विक पोखरेलले जानकारी दिए ।
प्राइभेट स्वास्थ्य संस्थामा पनि उनै पोखरेलले भिडियो एक्सरे गर्दै आएकाले उनी नहुँदा सदरमुकामका सबै भिडियो एक्सरे सेवा प्रभावित हुने बिरामीहरुको गुनासो छ । धौलागिरी अस्पताल बागलुङमा दैनिक ५० देखि ६० जना भिडियो एक्सरे गर्नुपर्ने बिरामी उपचारको लागि आउँछन् ।
हप्ताको दुई दिन आइतबार र बुधबार त त्यो संख्या बढेर झण्डै सय पुग्छ । तर, पछिल्लो समय अस्पतालमा भिडियो एक्सरे गर्ने रेडियोलोजिष्टको अभावको कारण नियमिति चेकजाँच गर्नुपर्ने गर्भवती र बिरामीहरु मर्कामा परेका छन् ।
धौलागिरी अस्पताल बागलुङमा गण्डकी प्रदेश सामाजिक विकास मन्त्रालयबाट करारमा खटाइएका एक जना मात्र रेडियोलोजिस्टले भिडियो एक्सरे गर्दै आएका थिए । सिंगो अस्पतालमा रहेका एक जना मात्र रेडियोलोजिष्ट केही दिन बिदामा बस्दा मात्रै ठुलो समस्या सिर्जना हुन्थ्यो । तर, यतिबेला अस्पतालबाट बिदा मागेका उनले इमेल मार्फत राजीनामा पठाएपछि अस्पतालको सेवा प्रभावित मात्र होइन, थप अन्योलमा परेको छ ।
सामाजिक विकास मन्त्रालयबाट करारमा खटिएका रेडियोलोजिष्ट डा.अजय पोखरेलले वैशाख ९ र १० गतेको लागि भन्दै अस्पताल प्रशासनमा बिदा माग गर्दै निवेदन दिएका थिए । तर, वैशाख १२ गते सम्म अस्पतालमा उपस्थित नभएका उनले दुई हप्ता अगाडी इमेल मार्फत राजीनामा पत्र पठाएको धौलागिरी अस्पताल बागलुङका प्रमुख डा. शैलेन्द्र वि.क पोखरेलले बताए ।
कोरोना महामारीको बिचमा सिंगो अस्पतालको एक मात्र रेडियोलोजिष्ट नहुँदा दैनिक सयौ बिरामी प्रभावित बनेको भन्दै प्रदेश मन्त्रालयमा जानकारी गराए पनि तत्काल समस्या समधानको उपाय नदेखिएको डाक्टर पोखरेलको भनाई छ ।
इमेल मार्फत राजीनामा पठाएका रेडियोलोजिष्ट अजय पोखरेललाई अस्पतालमै आएर सल्लाह गरि राजीनामा दिन आग्रह गरेको भए पनि नआएको अस्पताल प्रशासन प्रमुख तारानाथ शर्माले बताए ।