ताजा अपडेट »

कोरोना हटस्पट बन्यो लुम्बिनीको बाँके,‘लकडाउनको आवश्यकता’

आइतबार, ०५ बैशाख २०७८, १४ : ३५
4 Shares

नेपालगञ्ज । पछिल्लो पटक कोरोना हटस्पट बनेको बाँकेमा कोरोना भाइरसको संक्रमण नियन्त्रण भन्दा बाहिर गएको छ । विशेष गरेर नयाँ वर्षको आगमनसँगै जिल्लामा कोरोना संक्रमण आक्रामक रूपमा फैलिएको छ । आइतबार भेरी अस्पताल नेपालगञ्जको प्रयोगशालामा ८१ नमूना परिक्षण गर्दा ७५ जनामा संक्रमण पुष्टि भएको अस्पतालले जनाएको छ । जसअनुसार संक्रमण दर ९२.६ प्रतिशत रहेको पाईएको छ ।

गएको एक साताको अवधीमा गरिएको परीक्षणको विष्लेशण गर्दा संक्रमण दर अतिनै उच्च रहेकोले जिल्लामा कोरोना नियन्त्रण भन्दा बाहिर गैसकेको पुष्टि भएको भेरी अस्पतालका चिकित्सकहरुले जनाएका छन् । भेरी अस्पतालका प्रमुख डा. प्रकाश थापाले आइतवार मात्रै संक्रमण दर ९२.६ प्रतिशत रहेको भेटिएपछि आफुहरु निकै चिन्तामा परेको जनाउँदै समुदायस्तरमा धेरै ठुलो संख्या संक्रमण फैलिसकेको देखिएको बताए ।

उनले अब समुदायस्तरमा परीक्षणको आवश्यकता रहेकोले त्यसतर्फ सबैले तत्कालनै ध्यान दिनु आवश्यक रहेको बताए। उनले बाँकेको गम्भीर अवस्थालाई हेरेर लकडाउनको विकल्प नदेखिएको पनि बताए । जिल्ला कोभिड १९ संकट व्यवस्थापन केन्द्र बाँकेका अनुसार शनिवार १६६ र शुक्रवार २०० जनामा संक्रमण पुष्टि भएको थियो । गत चारदिनमा मात्रै जिल्लामा ६ सय भन्दा बढी संक्रमित थपिएका छन् । भेरी अस्पतालको प्रयोगशालामा आइतवार पुष्टि भएका कोभिड संक्रमितहरू अधिकांश स्वास प्रस्वास सम्बन्धी समस्या ज्वरो वा अन्य लक्षण सहित उपचारका लागि अस्पताल आएका बिरामीहरू रहेको प्रयोगशालाले जनाएको छ ।

भेरी अस्पताल नेपालगञ्जले संक्रमणको अवस्था समुदायमा कस्तो छ भनि जान्न समुदाय स्तरबाटै नमूना संकलन गरी परिक्षण गर्न आवश्यक रहेको जनाएको छ । यसका लागि सरकारबाट प्रयाप्त रियजेन्ट र अन्य आवश्यक सामग्री प्राप्त हुने हो भने परिक्षणको दायरा बढाउन अस्पताल सधैं तयार रहेको अस्पतालले जनाएको छ । भेरी अस्पतालको कोरोना विशेष आइसोलेसन वार्डको १०२ बेड र संकास्पद विरामीलाइ राख्ने ४० शैयाको प्रि आइसोलेसन वार्ड गरी जम्मा १४२ बेड भरिइसकेको अस्पतालका सूचना अधिकारी डा. संकेत रिसालले बताए ।-सिराज खान/गोरखापत्र अनलाइन

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।