‘विदेशी पर्यटक भित्र्याउन सरकारले पहल कदमी लिनुपर्ने’

काठमाण्डौं । पर्यटक व्यवसायीले विदेशी पर्यटक नेपाल भित्र्याउनका लागि सरकारले पहलकदमी लिनुपर्ने बताएका छन् । नेपाल कम्युनिष्ट पार्टी (नेकपा) सम्बद्ध पर्यटन सङ्गठनका संयोजक नवराज पाण्डे, नेपाली कांग्रेस सम्बद्ध नेपाल पर्यटन व्यवसायी सङ्घका सहअध्यक्ष रामशरण थपलिया र जनता समाजवादी पार्टी सम्बद्ध पर्यटन व्यवसायी सङ्गठनका अध्यक्ष सुरेश अमगाइले संयुक्त विज्ञप्ति जारी गरी सरकारको ध्यानाकर्षण गराएका हुन् ।

पर्यटन सङ्गठनहरुले नेपाल भ्रमणका लागि आउने विदेशी पर्यटकलाई लगाउँदै आएको एक हप्ते क्वारेन्टिन हटाउन माग गरेका छन् । यस्तै पर्यटक के कामका लागि नेपाल आएको हुन् सोही संस्थाको सिफारिसमा ‘अराइभल’ राहदानी उपलब्ध गराउने व्यवस्था गर्नुपर्ने बताएका छन् । कोभिड–१९ का कारण चार लाख प्रत्यक्ष तथा ११ लाख अप्रत्यक्ष रुपमा पर्यटन व्यवसायी तथा मजूुरको जागीर धरापमा परेको भन्दै पर्यटन मजदूरलाई तत्काल राहत प्याकेज ल्याउन माग गरेका छन् ।

नेपाल भ्रमणका लागि आएका पर्यटकलाई सीमा नाका वा विमानस्थलमा स्वाब सङ्कलन गरी यथाशक्य पिसिआर रिपोर्ट दिने व्यवस्था गर्नुपर्ने, स्थानीय तहले लगाएको घुमफिर प्रतिबन्ध खुला गर्नुपर्ने, व्यवसाय सञ्चालनका लागि पाँच प्रतिशत दरमा कर्जा दिनुपर्ने नीतिगत व्यवस्था गर्नुपर्ने बताइएको छ ।