पाल्पाको तिनाउमा झाडापखाला विरुद्धको रोटा खोप अभियान

तिनाउ । पाल्पाको तिनाउ गाउँपालिकामा रोटा भाइरस (झाडापखाला) विरुद्धको खोप अभियानको शुभारम्भ गर्दै गाउँपालिका अध्यक्ष ओमबहादुर घर्तिले कोही पनि बालबालिकालाई नछुटाउन आह्वान गरेका छन् । तिनाउ–३ झुम्साबाट सोमबार देखि सुरु भएको अभियानमा घर्तिले अभियानलाई प्रवाकारी बनाउन स्वास्थ्यकर्मी, जनप्रतिनिधी तथा सबै तहका कर्मचारी तथा आम नागरिकलाई आह्वान गरेका हुन् ।

रोटा भाइरसका कारण नवजात शिशु तथा बालबालिकामा हुने झाडापखाला संक्रमण रोक्नका लागि ६ हप्ता पुगेका बालबालिकाहरुलाई पहिलो पटक मुखबाट खोप दिने गरिन्छ भने त्यसको १० महिनापछि दोस्रो खोप दिनइने गाउँपालिका स्वास्थ्य शाखा इन्चार्ज कृष्ण कार्कीले जानकारी दिए । बालबालिकाहरुलाई रोटा खोपका साथै डि.पि.टी. र हेपाटाइटिस बि. विरुद्ध खोप दिइने छ । नेपाल सरकारले गएको असार महिनादेखि थप गरेको रोटा खोप अभियान तिनाउमा पनि सुरु भएको हो । यो अभियासँगै गाउँपालिकामा १००० दिन आमा अभियान सम्बन्धि प्रवर्धनात्मक कार्यक्रम समेत सञ्चालन गरिने भएको छ ।

यस अभियानमा गाउँपालिका भित्र रहेका नवजात शिशुका आमाहरुलाई सरसफाई तथा पौष्टिक आहारका बारेमा घर–घरमा पुगी स्वास्थ्यकर्मीहरुले जानकारी गराउने छ । अभियानलाई सफल बनाउन आह्वान गर्दै कार्यक्रममा झुम्सा स्वास्थ्य इकाई व्यवस्थापन समितिका सदस्य सावित्रा पाण्डे, नर्सिङ इन्चार्ज रिता थापा तथा सिनियर अहेब ठाकुर कुवँरले बोलेका थिए।