ताजा अपडेट »

कार्यकर्तामुखी योजना भएको भनी विरोध

आइतबार, ०४ साउन २०७७, १२ : ४७
4 Shares

बझाङ । थलारा गाउँपालिकामा यस वर्षको बजेट वितरणप्रति विरोध भएको छ । गाउँपालिकाका नेपाली काँग्रेस पार्टीबाट जननिर्वाचित प्रतिनिधिसहित काँग्रेससमर्थक जनताले विरोध गरेका हुन् । काँग्रेस समर्थित जनप्रतिनिधिले गाउँसभामा आफ्नो कुराको सुनुवाइ नभएपछि दबाबका लागि पार्टीको साथ लिएर कार्यालयमा विरोध जनाइएको जनाएका छन् ।

थलारा–२ का वडाध्यक्ष हेम खड्काले काँग्रेसबाट निर्वाचित सदस्यको बेवास्ता गर्दै आफूखुशी मनोमानी ढङ्गले कार्यकर्ता र आफ्ना मान्छेलाई मात्र योजना वितरण गरिएको आरोप लगाउनुभयो । गत असार १० गते नीति तथा कार्यक्रम प्रस्तुत गरेको गाउँपालिकाले बजेट भने असारको अन्त्यमा आएर मात्र प्रस्तुत गरेको थियो । नौ वडा रहेको गाउँपालिकामा प्रत्येक वडामा रु ४० लाख बजेट दामासाहीले छुट्याइएको र अन्य सबै बजेट गाउँपालिका अध्यक्षलगायत अन्य प्रतिनिधिले गुपचुप रुपमा बाँडफाँट गरेको काँग्रेस समर्थित जनप्रतिनिधिले आरोप लगाएका छन् ।

गाउँपालिका अध्यक्ष भुवनेश्वर उपाध्यायले विकास बजेट रु ११ करोड जति भएको, यसमा रु दुई करोड जति म्याचिङ फन्ड गएको तथा बाँकी रु ४०÷४० लाख वडालाई विनियोजन गरी विषयगत शाखालाई बजेट राख्दा ठीकै भएको बताउनुभयो । उहाँले भन्नुभयो, “काँग्रेस समर्थित जनप्रतिनिधि साथीहरुको वडामा रु एक करोड बजेट दिनुप¥यो भन्ने माग थियो । साथै विषयगत शाखाको बजेट पनि वडामै दिनुपर्ने र म्याचिङ फन्ड कम गर्नुपर्ने माग छ ।”

यो हुन नसकेपछि उनीहरुले विरोध गरेको अध्यक्ष उपाध्यायले बताउनुभयो । आफूले स्थानीय सरकार प्रमुखको हैसियतले सुशासन, पारदर्शिता र जवाफदेहितालाई जोड दिएको बताउँदै उपाध्यायले भ्रष्टाचार र भ्रष्टाचारजन्य कार्य गरे कसैलाई क्षम्य नहुने दृढता व्यक्त गर्नुभयो ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।