शंकरनगर सामुदायिक वनमा श्रीखण्ड पार्क निर्माण गर्न वृक्षा रोपण

• 

तिलोत्तमा । रुपन्देहीको शंकरनगर सामुदायिक वन उपभोक्ता समूहले समूहको कार्यालय देखि पूर्व पानी पोखरी र वोरिङ्ग रहेको वन क्षेत्रलाई श्रीखण्ड पार्कको रुपमा विकास गर्ने भएको छ । उक्त क्षेत्रलाई श्रीखण्ड पार्कका रुपमा विकास गर्ने उद्देश्य अनुरुप सो क्षेत्रमा श्रीखण्डका विरुवा रोपण गरिएको छ । प्रदेश ५ का उद्योग, पर्यटन, वन तथा वातावरण मन्त्री लिला गिरीले शनिवार एक कार्यक्रमका बीच श्रीखण्डका विरुवा रोपण गरेर श्रीखण्ड बृक्षारोपण कार्यक्रमको शुभारम्भ गरे ।

शंकरनगर सामुदायिक वनको आयोजना र तिलोत्तमा नगरपालिकाको सहयोगमा गरिएको श्रीखण्ड विरुवा रोपण कार्यक्रममा बोल्दै मन्त्री गिरीले श्रीखण्डका विरुवा रोपणसँगै शंकरनगर सामुदायिक वन विविधता युक्त वन हुने र विभिन्न प्रजातिका वनस्पतिले वनलाई संमृद्धि तर्फ अगाडी बढाउने बताए । यो क्षेत्रलाई श्रीखण्ड पार्कको रुपमा विकास गर्न सके यसले नयाँ आयाम थप्नुका साथै पार्कको आकर्षणले यस क्षेत्रको होटल तथा पर्यटन ब्यवसायको प्रवद्र्धनमा समेत ठूलो टेवा पुर्याउने विश्वास ब्यक्त गरे ।

नेपालमा बोट-विरुवा रोप्ने अभियान राम्रो भए पनि रोपिएका विरुवा हुर्काउने, जोगाउने र संरक्षण गर्ने कार्यमा ध्यान पुग्न नसकेको भन्दै मन्त्रि गिरीले श्रीखण्डका विरुवा जोगाउने र संरक्षण गर्ने काममा ध्यान दिन सामुदायिक वनलाई आग्रह गरे । कार्यक्रममा तिलोत्तमा नगरपालिकाकाका प्रमुख बासुदेव घिमिरेले सो क्षेत्रलाई श्रीखण्ड पार्कका रुपमा विकास गर्ने उद्देश्य अनुरुप तिलोत्तमा नगरपालिकाले सामुदायिक वनलाई श्रीखण्डका विरुवा सहयोग गरेको वताए । रुपन्देहीमा श्रीखण्डका विरुवा रोप्ने पहिलो कार्यक्रम भएको वताउंदै नगरप्रमुख घिमिरेले पार्कमा एक हजार श्रीखण्डका विरुवा रोप्ने अभियान अन्तर्गत नगरपालिकाले पहिलो चरणमा सामुदायिक वनलाई ५ सय विरुवा उपलब्ध गराएको वताए ।

विरुवा सौजन्यसँगै रोपिएका विरुवा संरक्षणका लागि नगरपालिकाले पार्कको वरिपरि तारवार तथा विरुवा रोपेर खाली रहेको जमिनमा श्रीखण्डको विरुवाको सपोर्टका लागि नगदे वाली गर्ने विषयमा युएनडिपिसँग छलफल चलिरहेको वताए । सामुदायिक वनका सचिव इन्दु थापाको संचालनमा भएको कार्यक्रममा समूहका अध्यक्ष राम गिरीले श्रीखण्ड पार्कको संरक्षण तारवारका लागि प्रदेश सरकार र नगरपालिकालाई सहयोग गर्न आग्रह गरे । वन कार्यालयले सालजन्य काठ दाउरा बिक्री वितरणमा रोक लगाएका कारण सामुदायिक वनका कर्मचारीलाई तलब खुवाउन र कार्यालय संचालनमा समेत समस्या भएकाले तारवार र संरक्षणका लागि प्रदेश सरकार र नगरपालिकालाई सहयोग गर्न आग्रह गरिएको बताए ।

श्रीखण्डको विरुवा हुर्कनका लागि साथमा सहयोगि विरुवाको आवश्यक्ता पर्ने र एक विरुवा देखि अर्को विरुवा ५ मिटरको दुरीमा रोप्नु पर्ने भएकाले सामुदायिक वनले विज्ञको परमर्शमा श्रीखण्डका विरुवा रोप्ने काम गरेको बृक्षारोपण कार्यक्रमका संयोजक तथा समूहका उपाध्यक्ष रविन्द्र बस्नेतले बताए । उनका अनुसार पहिलो चरणमा ५ सय विरुवा रोपिने छ ।