कुलोमा डुबेर दाङमा एक जनाको मृत्यु

दाङ। घर नजिकै रहेको कुलोमा डुबेर अश्वारामा एक व्यक्तिको मृत्यु भएको छ । मृत्यु हुनेमा तुलसीपुर ८ अश्वारा निबासी ४८ बर्षका केशव भण्डारी रहेको ईलाका प्रहरी कार्यालय तुलसीपुरका प्रहरी निरीक्षक चक्र डम्बरपालले जानकारी दिए ।

खेतबाट आएर घर नजिकै रहेको लौबस्ताको कुलामा नुहाउन गएका भण्डारीलाई कुलामा घोप्टो अवस्थाम देखेपछि स्थानीयले उपचारका लागि राप्ती प्रादेशिक अस्पताल तुलसीपुर लगेका थिए । भण्डारीको अस्पतालमा उपचारको क्रममा मृत्यु भएको प्रहरी निरीक्षक डम्बरपालले जानकारी दिए ।
त्यसैगरी राप्ती नदीले बगाउँदा दाङमा एक जना महिलाको मृत्यु भएको छ । राप्ती गाउँपालिका वडा नं. ४ मौरीघाट निवासी ५२ वर्षीया बसन्ता गिरीको मंगलबार राप्ती नदीले बगाउँदा मृत्यु भएको प्रहरीले जनाएको छ ।

प्रहरीका अनुसार उनी बिहान ४ घरबाट कसैलाई नसोधि निस्किएकी थिइन् । राप्ती गाउँपालिका ३ भानपुरमा राप्ती नदिमा मृत अवस्था फेला परेको ५ नम्बर प्रदेश प्रहरी कार्यालयले जनाएको छ । उनी भालुवाङस्थित राप्ती नदी पुलको आसपासबाट बगेको हुन सक्ने आशंका गरिएको छ । घटनाबारे अनुसन्धान भइरहेको प्रहरीले बताएको छ ।