ताजा अपडेट »

इन्स्टिच्यूट सञ्चालन गर्न माग गर्दै मन्त्रीलाई ज्ञापनपत्र

आइतबार, २१ असार २०७७, २२ : २३
22 Shares

बुटवल । लुम्बिनी नन् एकेडेमिक इन्ष्टिच्यूट एशोसिएशनले इन्स्टिच्यूटहरु सञ्चालन गर्न माग गर्दै सामाजिक विकास मन्त्रालयमा ज्ञापन पत्र बुझाएको छ । आइतबार एशोसिएशनका अध्यक्ष निलम अधिकारी नेतृत्वको टोलीले सामाजिक विकास मन्त्री सुदर्शन बराललाई ज्ञापन पत्र बुझाएका हुन् ।एशोसिएशनले लकडाउन र कोरोना त्रासबाट इन्स्टिच्यूटहरु ४ महिनादेखि बन्द भएको भन्दै घरभाडा मिनाह, कर मिनाह, छात्रवृत्ति अक्षय कोष निर्माण सहयोगार्थ सहितको ७ बुँदे ज्ञापन पत्र सामाजिक विकास मन्त्री सुदर्शन बराललाई बुझाएका हुन् ।

एशोसिएशनले स्वास्थ्य सावधानी अपनाउँदै एक बेञ्च, एक विद्यार्थी राखेर अध्ययापन गर्न समेत ज्ञापन पत्र मार्फत अनुरोध गरेको छ । औपचारिक शिक्षा प्रदान गर्ने स्कुल कलेजहरुले हाल सञ्चालन गर्दै आएका अनलाईन तथा प्रत्यक्ष कक्षाहरु तुरुन्त बन्द गर्न पनि माग गरेको छ । एशोसिएसनका अध्यक्ष निलम अधिकारीले इन्स्टिच्यूटबाट अध्यापन हुने कक्षाहरु अनलाइन कक्षाका नाममा कलेज र विद्यालयले सञ्चालन गरेको भन्दै तत्काल बन्द गर्न आग्रह गरिएको समेत बताए ।

एशोसिएसनका सचिव प्रितम भुसालले शिक्षा क्षेत्रमा टेवा पुराउने इन्स्टिच्यूटहरुलाई सरकारले वेवास्ता गरेको भन्दै औपचारिक शिक्षा प्रदान गर्ने विद्यालय कलेजलाई हेर्ने दृष्टिकोणले इन्स्टिच्यूटलाई पनि हेर्नुपर्ने बताए । ज्ञापन पत्र बुझ्दै सामाजिक विकास मन्त्री सुदर्शन बरालले छिट्टै इन्स्टिच्यूटहरुको माग सम्बोधन गर्ने प्रतिबद्धता व्यक्त गरे । अझै पनि कोरोना संक्रमण र लकडाउन जारी रहेको भन्दै ज्ञापन पत्रमा उल्लेखित मागका सम्बन्धमा चरणबद्ध रुपमा छलफल गरेर निचोड निकाल्ने उनले बताए ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।