ताजा अपडेट »

विस्थापन गरिँदै फुस र खपडा छाना

शुक्रबार, १९ असार २०७७, १७ : २९
8 Shares

लुम्बिनी । रुपन्देही क्षेत्र नं ३ का ८२७ फुस र खपडाले छाएका घरका छाना विस्थापन गरिने भएको छ । कृषि तथा पशुपक्षी विकासमन्त्री घनश्याम भुसालले ती घरमा टिनको छानो लगाउन कार्यक्रम ल्याइएको जानकारी दिए । आगामी आर्थिक वर्ष २०७७/७८ मा जिल्लाको सिद्धार्थनगरका १४६, शुद्धोधन गाउँपालिकाका १५६, बुटवल उपमहानगरपालिकाका ८५ र तिलोत्तमा नगरपालिकाका १०७ घरको छानो परिवर्तन हुने छ । त्यसैगरी सियारीमा १३०, मायादेवीमा १०० र ओमसतिया गाउँपालिकाका १०३ घरमा टिनको छानो लगाइने जनाइएको छ ।

क्षेत्र नं ३ का सांसदसमेत रहेका मन्त्री भुसालले सुरक्षित नागरिक आवास कार्यक्रमअनुसार फुस र खपडाका घरमा बसिरहेकाको पहिचान गरी घरको छानो परिवर्तनमा सहयोग गर्न थालेको उनका स्वकीय सचिव मनोज रिजालले बताए । उनले भने, “फुसले छाएको वा खपडाले छाएको घरको छानो स्तरोन्नति गर्नेगरी छनोट गरिएको छ । आगामी आर्थिक वर्षभित्र विपन्न तथा गरिब घरपरिवारकाका घरको छानो सबैको टिनको हुनेछ ।” गत वर्ष गुल्मीमा सञ्चालनमा आएको उक्त कार्यक्रम चालू वर्षमा कपिलवस्तुमा सञ्चालनमा रहेको थियो । शहरी तथा भवन डिभिजन कार्यालयको प्रत्यक्ष निगरानीमा सम्पन्न हुने उक्त कार्यक्रमअनुसार फुस, खरको छानो तथा खपडाले छाएको छानो मुक्त बनाउनेगरी सञ्चालन गरिएको कार्यालयका प्रमुख इञ्जिनीयर राजेन्द्र पाण्डेले जानकारी दिए ।

यहाँका केही शहरी र ग्रामीण क्षेत्रमा अहिले पनि फुस र खपडाले छाएका घर छन् । गैडहवा गाउँपालिकाले छानामा टिन लगाउने गरी चालू आवमा रु ४५ लाख विनियोजन गरेको जनाइएको छ । गाउँपालिका अध्यक्ष बछुलाले भने, “हामीले यस वर्ष पनि काम गरिरहेका छौँ । आगामी वर्षका लागि बजेट व्यवस्थापन गरेका छौँ ।”

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।