प्रदेशबाट फर्किँदा घर गुमाएका दिलबहादुरलाई यूवाको राहत

दाङ । दाङको बङ्गलाचुली–२ टाकुराका दिलबहादुर बुढा रोजगारीको सिलशिलामा करिव डेढ दशकदेखि भारतको दिल्लीमा रहँदै आएका छन् । उनको नेपाल आउजाउ अक्सर गरेर विशेष अवसरमा मात्रै हुनेगर्छ । विशेष कामका कारण उनी आफ्ना जहान परिवारलाई भेट गर्न र थाँती रहेका केही काम सकाउन यही फागनु २० गते घर फर्किए । उक्त दिन थरुहटले बन्द आह्वान गरेको थियो । बन्दको प्रभावले उनी समयमा घर पुग्न पाएनन्, टिप्पर चढेर गन्तव्यमा हिँडेका दिलबहादुर राती १० बजे बङ्गलाचुलीको पुरुङछेडा पुगे । त्यहाँबाट करिव आधा घण्टाको पैदल यात्रा गरेपछि उनको घर पुग्न सकिन्छ । उनी घरतर्फ लम्कँदै गर्दा बाटैमा प्रहरी र स्थानीयको आउजाउ गर्नेले टाकुरामा आगलागी भएको खबर सुनाए । उनको मनले सङ्केत गर्यो, कतै मेरै घरमा त होईन ? नभन्दै निमेषभरमै मोबाइलमा खबर आयो । उनकै घरमा आगलागी भएको । हतार हतार उनी घर पुग्दा उनको घर आगोले जलेर खण्डहर भइसकेको थियो ।

परिवारमा खुशी साट्न परदेशबाट घरदेश आएका दिलबहादुरको घर खरानी हुँदा उनकी जीवन संगिनी गीतादेवी बुढा दुई छोरी चाहना बुढा, बिपासा बुढा र एक छोरा विनायक बुढालाई काखमा च्यापेर बिलौना गर्दै थिईन् । आगो राती १२ बजेतिर नियन्त्रणमा आयो । आगलागीमा परि उनको अन्नपात, लत्ताकपडा, केही नगद खरानी भए । उक्त आगलागीमा करिब ६ लाख बराबरको क्षति भएको छ । घरबार बिहिन भएपछि बुढा परिवारको दैनिकी खुला आकाशमा बितेको थाहा पाएपछि घोराहीमा रहेका युवाहरुको एक समुहले शनिबार पीडित परिवारको घरमै पुगेर राहत प्रदान गरेको छ । बुढाको परिवार तथा छोराछोरीको दैनिकी अत्यन्तै कष्टकर रुपमा बितिरहेको जानकारी पाउनासाथ नरेन्द्र पुनको सक्रियतामा युवाहरुको एक समुहले पीडितको घरसम्म पुगेर करिव ४२ हजार रुपैयाँ बराबरको खाद्यान्न, भाँडाकुडा तथा लत्ताकपडा सहयोग गरेको हो ।

बङ्गलाचुली गाँउपालिका उपाध्यक्ष यमुना घर्ती र वडा नम्बर २ का अध्यक्ष मेघबहादुर राना मगरको रोहवरमा पीडित परिवारलाई शनिबार राहत प्रदान गरिएको हो । न्यू लुक फेन्सी ग्यालरीका शंकर गिरी, इगल सु–सेन्टरका धनश्याम अधिकारी, बिशाल फेशन हाउस, जीबी मिनी मार्टका राज रोका, केशव रोका, लामा फेन्सि स्टोर, व्यवसायी प्रेम बुढा मगर, साजन बुढा मगर, समाजसेवी राजपूर्ण पुन, भीम केसी, शिक्षक मुकेश डिसी, व्यवसायी आदित्य भट्टराई, भ्यू कुमार पुन, समाजसेवी नरेन्द्र पुनलगायत पत्रकारको संयुक्त टोलीले सहयोग प्रदान गरेको हो । सो अवसरमा गाउँपालिका उपाध्यक्ष घर्तीले यस्ता खालका भवितव्य जो कोहीलाई पनि पर्न सक्ने हुँदा सहयोग गर्ने भावना जागृत सबैमा हुनु आवश्यक रहेको बताईन् । आगलागी पीडितलाई सहयोग गरेकोमा उनले सहयोगी युवाहरुलाई धन्यवाद दिईन् ।

यस्तै उनले आगलागी पीडितको घर पुनर्निर्माणको लागि बङ्गलाचुली गाँउपालिकाले टिन र आर्थिक सहयोग गर्ने, स्थानीय बन समूहले काठ र जनसमुदायबाट जनश्रमदान गरी चाँडै नै घर बनाएर बुढा परिवारलाई बासको व्यवस्था गरिने बताईन् । यस्तै, बुढाका दुवै छोरी वौद्धिक अपांग भएको हुँदा उनीहरूको उचित पठन–पाठनका लागि घोराहीस्थित बालमन्दिरमा व्यवस्थापन गर्ने तयारी भएको छ । जसका लागि गाउँपालिकाले पहल गर्ने पनि उपाध्यक्ष घर्तीले वचन दिइन् ।