वडा कार्यालयको ताला ६ दिनपछि खुल्यो

दाङ । वडा स्थानान्तरणको विषयलाई लिएर दाङको तुलसीपुर उपमहानगरपालिका वडा नं. ४ मा स्थानीयले लगाएको ताला खोलिएको छ । आइतबारदेखि लागेको ताला आन्दोलनरत पक्ष र उपमहानगरपालिकाबिच सहमति भएपछि खुलेको हो । कार्यवाहक नगरप्रमुख सुर्यबहादुर डाँगीले ताला खोलेको हुन् । उनले सबै वडाबासीलाई पायक पर्ने गरी वडा कार्यालय कहाँ राख्ने भन्ने वारेमा अध्ययन गरिने पनि बताए । ‘हामीले कार्यदल बनाएका छौं यसले सबै कुराको अध्ययन गरेर नगरसभामा प्रतिवेदन पेश गर्नेछ’ -डाँगीले भने ।

वडा कार्यालय सार्ने कुरा नगर सभाको दुइतिहाई वहुमतले मात्रै निर्णय गर्न सक्ने भन्दै उनले कानुनी प्रक्रिया पुरा गरेर मात्रै सम्भव हुने वताए । ‘वडाले एकलौटी निर्णय गरेर मात्रै यो सम्भव हुँदैन’ डाँगीले भने । यसैविच ताला खोल्नु अगाडि उपमहानगरपालिकामा वडावासीसँग छलफल समेत गरिएको थियो । छलफलमा दुवै तर्फका वडावासीहरुको सहभागिता रहेको थियो । छलफलले २ वुँदे सहमति गरेपछि ताला खोल्ने प्रक्रिया अगाडि वढेको हो । वडा नम्वर ४ को केन्द्र स्थानान्तरणका लागि स्थानीय सरकार सञ्चालन ऐन २०७४ वमोजिम प्रक्रिया अगाडि वढाउनका लागि राय र सुझाव संकलन गर्न परामर्श समिति वनाउने सहमति भएको छ । आगामी असार १५ गते नगरसभामा पेश गर्नका लागि सुशासन समिति संयोजक सुर्यवहादुर डाँगीको संयोजकत्वमा वडा नम्वर ४ का क्रियाशिल सबै राजनीतिक दलका प्रतिनिधि, ढुण्डिराज खनाल र गणेश गिरी सदस्य रहने गरी कार्यदल गठन गरिने भएको छ । जसको सदस्य सचिवमा वडा सचिव लोकमणी पोख्रेल रहेका छन् ।

त्यसैगरी कार्यदलको प्रतिवेदन प्राप्त नहुँदासम्म विभिन्न समितिले वडा स्थानान्तरणका सन्दर्भमा पेश गरेका निवेदनमाथि कुनै कारवाही प्रक्रिया अगाडि नवढाउने सहमति भएको छ । ताला खुलेपछि वडाध्यक्ष वालकृष्ण रानाले जनतालाई मान्य हुनेगरी वडा स्थानान्तरणको प्रक्रिया अगाडि वढाउने प्रतिक्रिया दिएका छन् । उनले कार्यदललाई जनप्रतिनिधिको हिसावले सघाउने समेत प्रतिवद्धता जनाएका छन् । वडा समितिले सवैलाई पायक पर्ने भन्दै वडा वनहरीमा वडा कार्यालय सार्ने निर्णय गरेपछि हाल वडा कार्यालय रहेको गणेशपुर र मजुवाका जनताले तालावन्दी गरेका थिए ।