विश्वका ८१ देशमा कोरोनाको संक्रमण

फागुन २२,

काठमाडौँ । कोरोना भाइरस संक्रमणको प्रकोप खेपिरहेको इटलीले आजदेखि १० दिनका लागि देशभरि सबै शैक्षिक संस्था बन्द गर्ने निर्णय गरेको छ । त्यहाँ विद्यालय र विश्वविद्यालयहरू मार्च १५ सम्म बन्द हुने अधिकारीहरूले बताएका बीबीसीले लेखेको छ ।

हालसम्म कोरोनाका कारण विश्वभरिमा झन्डै तीन हजार दुई सय जनाको मृत्यु भइसकेको छ भने ९० हजार बढी मानिस संक्रमित भएका अन्तराष्ट्रिय सञ्चार माध्यमहरुले खबर लेखेका छन् । विश्व स्वास्थ्य सङ्गठन (डब्ल्यूएचओ) ले हालसम्म कोरोनाभाइरस संक्रमणलाई विश्वव्यापी महामारी घोषणा गरेको छैन । तर बुधवार जर्मनीका स्वास्थ्यमन्त्रीले अब उक्त भाइरस संक्रमणलाई महामारीको परिभाषामा राख्न सकिने बताएका  छन् । अहिलेसम्म ८१ देशमा यसको संक्रमण पुष्टि भइसकेको छ ।