तीनकुनेको घटना अपराधकर्म हो, धर्मसँग जोडेर नहेरौँ : गृहमन्त्री

काठमाडौँ । गृहमन्त्री रमेश लेखकले चैत १५ गते राजधानीको तीनकुनेमा भएको घटना हिंसात्मक भएको बताएका छन् । प्रतिनिधिसभाको सोमबार बसेको बैठकमा सांसद प्रेम सुवालले सोधेको प्रश्नको जवाफ दिँदै लेखकले भने, ‘तीनकुने घटनाको आगजनी र हिंसा अपराधकर्म भएकाले त्यसलाई धर्मसँग जोडेर नहेर्न आग्रह गर्दछु, हिंसालाई धर्मसँग जोड्न सकिँदैन ।’ 
 
तीनकुने घटनाबारे आवश्यक अनुसन्धान भइरहेको पनि लेखकले जवाफ दिए । हिन्दु धर्मप्रति आफ्नो आस्था रहेको उल्लेख गर्दै लेखकले भने, ‘तर, त्यसको अर्थ अरू धर्महरू नराम्रा छन् भन्ने होइन ।’  उनले धर्मको आवरणमा आपराधिक काम गर्नु नहुने समेत बताए । 

तीनकुनेको जस्तै अपराधजन्य घटना हुन नदिने कुरामा नेपाल सरकार सचेत मन्त्री लेखकले प्रतिबद्धता जनाएका छन् ।  तीनकुनेमा राजावादी समूहले गरेको प्रदर्शनको कारण भएको क्षतिबारे अनुसन्धान भइरहेको उनले बताए ।
 
 प्रदर्शनमा गोली लागेर घाइते भएका दुई जनाको उपचार हुँदै गरेको उनले बताए । मन्त्री लेखकले भने,‘अरू घर फर्केका छन्, घाइतेहरूको सरकारले निःशुल्क उपचार गरिरहेको छ ।’ तीनकुनेमा पत्रकार सुरेश रजक र सविन महर्जनले ज्यान गुमाएका थिए ।