तिहारको टीका थाप्न दिदीको घर हिँडेका गुल्मीका एक युवा बाटोमै मृत फेला

गुल्मी । तिहारको टीका थाप्न दिदीको घर हिँडेका गुल्मीका एक युवा बाटोमै मृत अवस्थामा फेला परेका छन् । अर्घाखाँचीको भूमिकास्थान नगरपालिका वडा नं. ३ सिख्रास्थित भीरमा ती युवा मृत फेला परेका हुन् । मृत फेला पर्नेमा गुल्मीको धुर्कोट गाउँपालिका वडा नं. २ पिपलधारा बस्ने ३६ वर्षीय खुम बहादुर घर्ती रहेको जिल्ला प्रहरी कार्यालय अर्घाखाँचीले जनाएको छ ।

कात्तिक २९ गते अर्घाखाँचीको भूमिकास्थान नगरपालिका वडा नं. ३ सिख्रास्थित आफ्नो दिदी कमला घर्तिको घरमा तिहारको टिका लगाउन भनी हिँडेका घर्ती शुक्रबार मृत अवस्थामा फेला परेको प्रहरीको भनाई छ । प्रहरीका अनुसार टिका लगाउन घरसम्म नपुगेपछि खोजी गर्ने क्रममा उनको शव फेला परेको थियो । घटनाबारे थप अनुसन्धान भइरहेको प्रहरीले जनाएको छ ।

यसैबीच गुल्मीको कालिगण्डकी गाउँपालिका-१ बकेवाका एक युवा शनिबार मृत अवस्थामा फेला परेका छन् ।  कार्तिक ३० गते अन्दाजी साँझ ७ बजेको समयमा घरबाट हिँडेका गुल्मी कालिगण्डकी गाउँपालिका-१ बकेवा बस्ने उमापति भट्टराईको छोरा २९ वर्षीय रमेश भट्टाराई मृत फेला परेका हुन् । घरबाट हर्मिचौरतर्फ लु.१६ प. ४३९५ नम्बरको मोटरसाइकलमा गएकोमा घरमा फर्कि नआएकोले खोजी गर्दा शनिबार हनुमान पार्क स्थित कच्चि सडक खण्डदेखि अन्दाजी २० मिटर तल भिरमा मृत अवस्थामा फेला परेका थिए ।  अनुशन्धानको लागि ईलाका प्रहरी कार्यालय रिडी गुल्मीबाट प्रहरी निरीक्षक अनिल थापा सहितको प्रहरी टोली खटि गई  अनुसन्धानको कार्य भईरहेको जनाइएको छ । सवारी ज्यान सम्वन्धी कसुरमा जाहेरी दिएको र सवको  गुल्मी जिल्ला अस्पताल तम्घासमा पोष्टमार्टम पश्चात आफन्तीले वुझी लगेको प्रहरीले जनाएको  छ  ।