विमानस्थहरुको लगानी अनुत्पादक : पूर्व अर्थराज्य मन्त्री राणा

गुल्मी । अर्थशास्त्री तथा पूर्व अर्थराज्यमन्त्री उदय शम्शेर राणाले नेपालमा धमाधम बन्दै गरेका विमानस्थलहरुको अर्बौं लगानी अनुत्पादक हरेको बताएका छन् । गुल्मी उद्योग संघले उपल्लो तम्घासमा सञ्चालन गरिरहेको गुल्मी महोत्सवको अवसरमा आयोजित गुल्मीमा लगानी सम्भाव्यता अध्ययन कार्यशाला गोष्ठीलाई सम्बोधन गर्दै प्रतिनिधि सभाका सांसद समेत रहेका राणाले यस्तो बताएका हुन् ।

‘काठमाण्डौंको एउटा अन्तर्राष्ट्रिय विमानस्थललाई मात्रै विकल्प स्वरुप अर्को विमानस्थल चाहिन्छ । जुन निजगढमा छ । पोखरमा २८ अर्ब र नजिकै ४० किलोमिटरको दुरीमा रहेको लुम्बिनीमा साढे ९ अर्ब भन्दा बढी खर्चेर बनाउन आवश्यक थिएन् ।’–राणाले भने । देशभर बनेका आन्तरिक विमानस्थल पनि खर्चभार बढी उपलब्धी कम भएको उल्लेख गर्दै उनले देशभर अहिले ६६ वटा आन्तरिक विमानस्थल बनेको र जसमध्ये ३८ वटा मात्रै सञ्चालनमा रहेको बताए । गुल्मीको रेसुंगा विमानस्थलको उदाहरण दिँदै उनले प्रश्न गरे ‘हप्तामा दुई चोटी मात्रै उडान भएपछि त्यो लगानीको परिपूर्ति कहिले होला ?’

हालसम्म विमानस्थलमा खर्चिएका लगानी परिपूर्ति गर्न अबको ८५ वर्ष लाग्ने बताउँदै उनले मोटरबाटो पनि त्यसरी नै राजनैतिक र जनदबाबमा अनावश्यक रुपमा खन्दै आइएकाले अब रोक्न स्थानीय सरकारलाई सुझाव दिए।