तिलोत्तमामा मंसिर १ गतेदेखि प्रर्दशनी मेला, ५ लाख दर्शक भित्राउने लक्ष्य

बुटवल । रुपन्देहीको तिलोत्तमा स्थित मणिग्राममा तेस्रो राष्ट्रिय औद्योगिक व्यापार मेला तथा कृषि एवम पर्यटन प्रवर्द्धन महोत्सव–२०८० ’ हुने भएको छ ।तिलोत्तमा उद्योग वाणिज्य संघको आयोजनामा मंसिर १ गतेदेखि ‘सबल अर्थतन्त्रको आधार, कृषि, एवम पर्यटन, उद्योग र व्यापार’ भन्ने मुल नाराका साथ तेस्रो राष्ट्रिय औद्योगिक व्यापार मेला तथा कृषि एवम पर्यटन प्रवर्द्धन महोत्सव हुने लागेको हो ।

मेलामा मुलुकका विभिन्न स्थानमा उत्पादित कृषि तथा औद्योगिक उत्पादनका साथै आधुनिक कृषि एवं औद्योगिक मेशिनरीको प्रदर्शनी एवं बिक्री हुने शुक्रबार मेला स्थलमा पत्रकार सम्मेलनको आयोजना गरी आयोजनकाले जानकारी गराएको छ ।
पत्रकार सम्मेलनमा बोल्दै तिलोत्तमा उद्योग वाणिज्य संघका अध्यक्ष तथा मेला मूल आयोजक समितिका अध्यक्ष गुणानिधि भण्डारी (माधव) ले प्रदर्शनीमा कृषिमा हुँदै गएको आधुनिकीकरण, स्वदेशी वस्तुको उत्पादन साथै व्यावसायिकीकरण, पर्यटनको सम्भावनासँगै ती स्थानको पहिचान एवं गन्तव्यको सुनिश्चितताको खोजी हुने बताए ।

मेलामा औद्योगिक प्रविधि, रेष्टुरेन्ट, कृषि, हस्तकला, गार्मेन्ट, बेकरी तथा कन्फेक्सनरी, छालाजुत्ता, खाद्यान्न, आइटी लगायत बिभिन्न प्रकृतिका ३०० स्टलहरू रहने संयोजक भण्डारीले बताए । साथै मेलामा स्थानीय उत्पादनहरुलाई विशेष प्राथमिकता दिने र स्थानीय उत्पादनलाई प्रोत्साहन गर्नका लागि निःशुल्क स्टलको व्यवस्था रहेको उनले बताए ।

मेला तथा महोत्सवलाई मनोरञ्जनात्मक बनाउनको लागि लोक दोहोरी प्रतियोगिता, नेपालका ख्याति प्राप्त गायक गायिका, हास्य कलाकार, स्थानीय कलाकारहरुको प्रस्तुती, सांगितिक कार्यक्रम, विद्यालय स्तरीय लोकनृत्य प्रतियोगिता, प्रदर्शनी आइडल आदि प्रतियोगिताहरु रहने आयोजकले जनाएको छ ।

मेलाको अवलोकनको लागि ८० रुपैयाँ टिकट शुल्क निर्धारण गरिएको र विद्यार्थीहरुलाई ५० प्रतिशत छुट र ७० वर्ष भन्दा माथिका जेष्ठ नागरिकलाई निःशुल्क प्रवेशको व्यवस्था रहेको महासचिव राजकुमार पाण्डेय बताए ।
मंसिर १२ गतेसम्म संचालन हुने मेलामा ५ लाख दर्शकले अवलोकन गर्ने र १५ करोड बराबरको आर्थिक कारोवार गर्ने लक्ष्य रहेको छ । साथै बिक्रि भएको टिकटको ५ प्रतिशत रकम सामाजिक सुरक्षा कोषका लागि छुट्टाइने महासचिव पाण्डेले बताए ।