सरसफाई वातावरण तथा हरियाली प्रबर्धन समिति बुटवल १२ र १३ द्वारा शुभकामना आदान प्रदान

बुटवल । सरसफाई वातावरण तथा हरियाली प्रबर्धन समिति बुटवल उपमहानगरपालिका १२ र १३ ले शुभकामना आदानप्रदान तथा चियापान कार्यक्रम सम्पन्न गरेको छ । नयाँ गाउँ खानेपानी तथा सरसफाई संस्थाको सहयोगमा विहिबार सो कार्यक्रम सम्पन्न भएको हो ।

शुभकामना आदानप्रदान कार्यक्रममा बोल्दै बुटवल उपमहानगरपालिका–१२ का वडाध्यक्ष डिल्लीप्रसाद शर्माले सभ्य र सामान्य रुपमा चाडपर्व मनाउनु पर्ने बताए । साथै आउँदै गरेको तिहारमा दान बाफत ११ हजार भन्दा बढी रकम नदिने कार्यपालिकाको बैठकबाट निर्णय भएको बताउँदै यसलाई इमान्दारिता पूर्वक कार्यान्वयन गर्न आग्रह गरे । सरसफाई वातावरण तथा हरियाली प्रबर्धन समिति बुटवल उपमहानगरपालिका १२ र १३ का संयोजक तथा वडा नम्बर १२ का वडा सदस्य गंगादत्त पौडेलले सरसफाई कार्यक्रमलाई अझ प्रभावकारी रुपमा अघि बढाउनु पर्ने बताए । मानिस स्वस्थ रहनका लागि सरसफाई महत्वपूर्ण रहेकाले आफ्नो घर मात्रै नभएर समाजलाई सफा र सुन्दर गराउनु पर्ने बताए ।

कार्यक्रममा वडा नम्बर १३ का वडा सदस्य झविन्द्र थापा, नयाँ खानेपानी तथा सरसफाई संस्थाका सल्लाहाकार र्धमराज शर्मा आचार्य, नयाँ खानेपानीकी अध्यक्ष रमा केसी, भैरहवा कुलापानी समितिका अध्यक्ष दयाराम न्यौपाने, लेखा संयोजक ज्ञानु पौडेल, सालधारी खानेपानीका सचिव रुद्र राना, बेलबार खानेपानीका उपाध्यक्ष जीवलाल पन्थी र टोल विकास संस्थाहरुको तर्फबाट नयाँ गाउँ टोल विकास संस्थाका सल्लाहाकार चोपकला पौडेल लगायतले शुभकामना मन्तव्य राख्दै सरसफाई एक पटक गरेर मात्रै नहुने भएकाले यसलाई निरन्तर रुपमा गरिरहनु पर्ने बताएका थिए ।

साथै उनीहरुले चाडपर्वलाई तडकभडक भन्दा पनि सामान्य र सभ्य रुपमा माउन जोड दिएका थिए । सरसफाई वातावरण तथा हरियाली प्रबर्धन समिति बुटवल उपमहानगरपालिका १२ र १३ का संयोजक गंगादत्त पौडेलको अध्यक्षतामा भएको कार्यक्रम सहसचिव गिरीराज कुँवरको संचालन र उपाध्यक्ष मिना जिसीको स्वागत मन्तव्य राखेकी थिइन् । शुभकामना आदान प्रदान तथा चियापान कार्यक्रममा बुटवल उपमहानगरपालिका १२ र १३ का ४९ वटा टोल विकास संस्थाका अध्यक्षहरु लगायतको सहभागिता रहेको थियो ।