संसदका तीन वटा समितिको बैठक बस्दै : विरोधका बीच विनोद चौधरीले अर्थ समितिको सभापतित्व गर्ने

काठमाडौं । संघीय संसदका तीन वटा समितिको बैठक बस्दैछ । संघीय संसद सचिवालयका अनुसार बिहान ११ बजे अर्थ समिति र राष्ट्रिय सरोकार तथा समन्वय समितिको बैठक बस्नेछ । साथै, , बिधायन ब्यवस्थापन समितिको बैठक दिउँसो १ बजे बोलाईएको सचिवालयले जनाएको छ । 

यसैबीच विपक्षीको विरोध र आफ्नै पार्टीका सांसदको असन्तुष्टि हुँदाहुँदै पनि नेपाली कांग्रेसका सांसद विनोद चौधरीले प्रतिनिधिसभाको अर्थ समितिको सभापतित्व गर्ने भएका छन् । बैठकको सभापतित्व ज्येष्ठ सदस्यका रुपमा चौधरीले गर्ने भएका हुन् । स्वार्थ बाझिने भएकाले चौधरीले समितिको सभापतित्व गर्ने मात्रै होइन, समितिमै बस्न पनि नमिल्ने भनेर विरोध हुँदै आएको छ ।

प्रतिनिधिसभाका समितिहरुको सभापति अहिलेसम्म पनि चयन हुन सकेको छैन । त्यसो हुँदा प्रतिनिधिसभा नियमावलीअनुसार समितिका ज्येष्ठ सदस्यले बैठकको सभापतित्व गर्दै आएका छन् । अर्थ समितिमा सबैभन्दा ज्येष्ठ सदस्य दीपक बोहोरा हुन् । तर, स्वास्थ्य समस्याका कारण उनी बोल्न सक्दैनन् ।

समितिको दोस्रो ज्येष्ठ सदस्य विनोद चौधरी हुन् । तर, उनी लामो समयदेखि समितिको बैठकमा उपस्थित नहुँदा त्यसपछिका ज्येष्ठ सदस्य सन्तोष चालिसेले समितिको सभापतित्व गर्दै आएका थिए । तर, २१ असारमा चालिसे अनुपस्थित हुँदा चौधरीले समितिको सभापतित्व गरेका थिए ।

प्रतिनिधिसभा नियमावली २०७९ मा स्वार्थ बाझिने सदस्यलाई सम्बन्धित समितिमा मनोनयन नगरिने उल्लेख छ । नियमावलीको को नियम १७५ (२) मा भनिएको छ, ‘समितिको कार्यक्षेत्रसँग स्वार्थ बाझिने सदस्यलाई सम्बन्धित समितिमा मनोनयन गरिने छैन ।’ अर्थ समितिको कार्यक्षेत्रमा अर्थ मन्त्रालय, लगानी बोर्ड, राष्ट्रिय प्राकृतिक स्रोत तथा वित्त आयोग, राष्ट्रिय योजना आयोग छन् ।

चौधरीको बैंक तथा वित्तीय संस्थामा ठूलो लगानी रहेको र ती विषय समितिको कार्यक्षेत्र पर्ने भएकाले त्यहाँ उनको स्वार्थ बाझिने विरोधीहरुको भनाइ छ । कांग्रेसकै एक वरिष्ठ नेताले पनि समितिमा चौधरीको स्वार्थ बाझिने बताए । ‘उहाँ ठूलो व्यापारी हुनुहुन्छ, त्यसो हुँदा सभापतित्व गर्न मिल्दैन भनेर समितिमा आवाज पनि उठेको छ । तर, पनि उहाँले सोमबारलाई बैठक बोलाउनुभएछ,’ ती नेताले नाम उल्लेख नगर्ने शर्तमा भने ।