यातायात स्वतन्त्र मजदुर संगठन लुम्बिनीको वार्षिक कार्योजना समीक्षा

लुम्बिनी । नेपाल यातायात स्वतन्त्र मजदुर संगठन लुम्बिनी प्रदेश कमिटी बुटवलले आज एक कार्यक्रमका बीच आ.ब. ०७९/०८० को बार्षिक कार्ययोजनाको समीक्षा र आगामी आ.ब.०८०/०८१ को कार्य योजनाको बारेमा भेला सम्पन्न गरेको छ । भेलालाई सम्बोधन गर्दै नेपाल ट्रेड युनियन महासंघ (जिफन्ट ) का केन्द्रिय सचिव हरि बहादुर कार्कीले विविध बिषयमा मन्तव्य राख्दै योगदानमा आधारित सामाजिक सुरक्षा कोषका बारेमा प्रकाश पारे ।

भेलामा सवारी दुर्घटनामा परि मृत्यु भएका हरिष तिवारी र शोभा भण्डारीका परिवारलाई बिमा बापतको रु. एक लाख आर्थिक सहयोग र घाइते भई उपचार गराएका प्रेम बहादुर थापालाई रु बीस हजार र घाइते महेश पौडेललाई रु छ हजार उपचार खर्च बापतको रकम हस्तान्तरण गरिएको छ । साथै सोही भेलाले राम बहादुर थापा मगरको अध्यक्षता मा ९ सदस्यीय पश्चिम रुट इकाई कमिटीको पुर्नगठन गरेको छ ।

उक्त भेलामा संगठनका केन्द्रिय उपाध्यक्ष एवम् लुम्बिनी प्रदेश इन्चार्ज ठाकुर गैरे, सहकारी बिभागका केन्द्रिय सदस्य नारायण प्रसाद भट्टराई, संगठनका केन्द्रिय सदस्य कृष्ण प्रसाद कंडेल लगायतले आ–आफ्ना भनाई राखेका थिए । कार्यक्रमको अध्यक्षता संगठनका लुम्बिनी प्रदेश कमिटी अध्यक्ष मोहन बहादुर क्षेत्रीको अध्यक्षतामा सम्पन्न कार्यक्रमको संचालन सचिव केशवराज पौडेलले गरेका थिए ।