भन्सारबाट परीक्षणविनै भित्रिन्छ भारतीय तरकारी

पुस २९,

काठमाण्डौ । भद्रपुर भन्सार कार्यालय छोटी भन्सारबाट मूल भन्सारमा स्तरोन्नति भएको १६ महिना बित्यो । भारतको बिहार राज्य र पश्चिम बंगाल जोड्ने मेची नदीमा पुल बनेसँगै भन्सारको राजस्व असुली पनि बढेको छ । तर, छोटी भन्सार कार्यालय हुँदा जति भौतिक संरचना थिए, त्यो पनि घटेको अवस्था छ । मूल भन्सारमा स्तरोन्नति भए पनि हालसम्म तरकारी तथा फलफूलको विषादी जाँच गर्ने क्वारेन्टाइन पनि छैन । भारतमा उत्पादन भएको तरकारी विषादी परीक्षणविनै नेपाल भित्रिने गरेका छन् । भद्रपुर भन्सार कार्यालयले भने त्यहाँबाट तरकारी आयातमा रोक लगाएको दाबी गरेको छ ।

ठूलो परिणाममा आयात गर्नैपर्ने भए बिर्तामोड वा काँकडभिट्टामा परीक्षण गर्ने गरिएको भन्सार प्रमुख फणीन्द्र खतिवडाको दाबी छ । तर, ठूला गाडीमा भारतीय तरकारी नभित्रिए पनि साइकल र ठेलामा दैनिक तरकारी भित्रिन्छन् । भारतको पश्चिम बंगाल र बिहार राज्यका विभिन्न ठाउँबाट काउली, आलु, टमाटर, प्याज, भिन्डीलगायत मौसिमी तरकारी नेपाल भित्रिने गर्छन् । ‘किसानले भद्रपुरसम्म सामान्य व्यापारका लागि ल्याउने गरेका छन् । त्यस्तो ठूलो परिमाणमा होइन’, प्रमुख खतिवडाले भने, ‘उनीहरूलाई यात्रुकक्षबाट सामान्य जाँच गरेर पठाइन्छ ।’ उक्त नाका भएर फलफूल भने आयात नहुने खतिवडाको दाबी छ । –नयाँ पत्रीका