तिलोत्तमाको ड्रिमल्याण्डले पूरा गर्यो १३ वर्ष : वैशाख १ देखि ‘ड्रिम क्याफे’ सञ्चालनमा आउने

बुटवल । पर्यटन उद्योगको क्षेत्रमा गुणस्तरीय र शान्त वातावरणसहित आतित्थ्यता प्रदान गर्दै आइरहेको तिलोत्तमाको मणिग्राम स्थित होटल ड्रिमल्याण्ड गोल्ड रिसोर्ट एण्ड होटल प्रा.लिले १३ औं वार्षिकोत्सव मनाएको छ । सो अवसरमा होटलमा कार्यरत १८ जना कर्मचारीहरुलाई विभिन्न विधामा सम्मान गरिएको छ ।

होटलमा कार्यरत कर्मचारी परिवारको मेहनत र लगनशिलताकै कारण यस क्षेत्रका उद्योगी, व्यवसायी, संघ–संस्था लगाएत अन्य सेवाग्राहीको पहिलो रोजाईका रुपमा ड्रिमल्याण्ड स्थापित भएको होटलका अध्यक्ष गोपाल रानाले बताए । १३ वर्ष पूरा गरी १४ औं वर्षमा प्रवेश गर्नु आफैमा ऐतिहासिक र खुसीको कुरा भएको बताउँदै उनले थप लगनशिल र कर्मशिल भएर अघि बढ्न होटल परिवारलाई आग्रह गरे । ग्राहकको मागलाई मध्यनजर गर्दै आगामी वैशाख १ गतेदेखि रिसोर्टमा ‘ड्रिम क्याफे सञ्चालनको तयारीमा रहेको उनले बताए । कर्पोरेट पर्सन तथा युवा पुस्तालाई लक्षित गरी सुविधासम्पन्न क्याफे सञ्चालनको तयारी अन्तिम चरणमा पुगेको उनले बताए । नेपालका ७ वटै प्रदेशमा होटलको नयाँ आउटलेट सञ्चालन गर्ने लक्ष्य रहेपनि कोरोना महामारी तथा मुलुकमा देखिएको आर्थिक मन्दीले काम अघि बढाउन समस्या भैरहेको रानाले बताए ।

मणिग्राम स्थित साढे चार बिघा क्षेत्रफलमा फैलिएको रिसोर्टमा करिब ६५ करोडको लगानी रहेको छ । १२ वटा डिलक्स, ४३ वटा सुपर डिलक्स, १ प्रियिम सुईट रुम र ४ वटा सुईट रुम गरि जम्मा ६० वटा सुबिधा सम्पन्न कोठाहरु रहेको यस रिसोर्टमा १५,०० जना क्षमताको मल्टिप्रपोज हल ,२०० जना क्षमताको कन्फ्रेन्स हल, १५० जना क्षमता एउटा मिटिङ हल तथा ४५ जना क्षमताको २ वटा मिटिङ हलहरु रहेको होटलका जनरल म्यानेजर लक्ष्मण खड्काले जानकारी दिए । यसैगरी १२० जना क्षमताको रेष्टुरेन्ट, भि.आइ.पि. लाउन्ज, हेल्थ क्लव, बार, कफि सप, बेबी पार्क तथा यस क्षेत्रकै ठूलो स्विमिङ पुल एवम् १ हजार बढी सवारीका लागि पार्किङ सुबिधा रहेको खड्काले बताए । यसैगरी मिनि क्यासिनो समेत सञ्चालनमा रहेको जनरत म्यानेजर खड्काले जानकारी दिए ।

आन्तरिक तथा बाह्य पर्यटकलाई लक्षित गरी सञ्चालनमा ल्याइएको यस होटलमा बुद्ध सर्किट अन्तरगतका ४५ प्रतिशत, भारतीय मुलका १५ प्रतिशत तथा यूरोपीयन मुलुकका ५ प्रतिशत बढी पर्यटकहरु आउने गरेको होटलका सहायक अपरेशन म्यानेजर राजेन्द्र पौडेलले जानकारी दिए । यसैगरी स्वदेशी तथा कर्पोरेट क्षेत्रका करिब ३५ प्रतिशत ग्राहक रहेको उनले बताए ।

होटलको शाखा विस्तार गरी सात वटै प्रदेशका मुख्य शहरहरुमा आतिथ्यता प्रादन गर्ने उद्देश्य रहे पनि मुलुकको आर्थिक मन्दी तथा कोरोना महामारीको प्रत्येक्ष मारमा पर्नु परेको होटलका सञ्चालक विष्णु बहादुर थापाले बताए । १३ औं वार्षिकोत्सवको अवसरमा शुभकामना आदानप्रादान गर्दै होटलका सञ्चालक गिता थापा तथा कम्पनीका लेखाप्रमुख दिपेन्द्र सिंह जिसीले ग्राहको सन्तुष्टीलाई पहिलो प्राथमिकतामा राखेर काम गर्नुपर्नेमा जोड दिएका थिए ।